anothir, that therbi be mad a solempne and a fer|uent remembraunce vpon the thingis seid in the firste reule, we mowe knowe and wite bi this, that so|lempne miraclis (suche as we kunnen not bi sufficient euydence impugne) God dooth in oon place and not in an other, and bifore summe ymage and not bifore an other. And therfore that God so chesith these placis and ymagis bifore othere it is of us to be holde, for therto we han this now seid myȝti evidence; but cer|tis whi and wherfore he chesith this place and this ymage bifore othere, we han noon evidence withinne doom of resoun, neither bi eny mark or evidence ȝouun to vs fro God; and therfore fro enquirancis whi God chesith this place and this ymage bifore othere into the seid effect of solempne remembrauncing vpon the seid thingis, we ouȝten algatis abstene and forbere. And so this present vije. reule or supposicioun is trewe.
Aftir these vij. reulis or supposiciouns y argue thus: Resoun wole and allowith and approueth nedis that men visite and haunte for the seide eende of solempne remembrauncing tho placis and tho ymagis, which it is sure God to chese into the seid eende and bi the seid euydencis of myraculis doing: forwhi ellis we conformeden not us to it wherto God vs callith and prouokith, wherof we ouȝten be waar. But so it is, that such seid visiting and haunting into the seid eende is not ellis than pilgrimage. Wherfore resoun wele iugith, allowith, and approueth pilgrimagis to be doon; and in this wise, fro the bigynnyng of the firste reule and supposicioun in this present chapiter hider to, is proued this present vje. conclusioun, that doom of weel disposid resoun allowith and approueth pilgrimage to be doon.
Who euer wole se more proof for this present vje. principal conclusioun, rede he in The book of wor|schiping, nameliche there in the ije. partie; and he
