come therto in reyny and wyndi wedris, and for that thei myȝten thanne be take awey bi wickid men not dreding God,) therfore it is ful resonable and worthi forto bilde ouer tho bodies and bonis and othere relikis chapellis or chirchis; ȝhe, and forto bilde bisidis hem auter and queris, that the office of preising God and of preiyng to God and to Seintis be in the better forme doon. And aȝenward, in a cuntrey where that of a Seint can not be had his bodi or bonis or eny relik of him, it is resonable and worthi that an ymage of him be mad and be sett vp in place into which peple mai come forto it biholde, and therbi make remembraunce of the bifore seid thingis in the firste and ije. reule: and it is ful reson|able and worthi that ther ouer be bildid chapel or chirche, and that auters and queris be maad therbi, for causis now next bifore spokun. And sithen of Crist crucified and of Marie his modir we han not the bodies or bonis, neithir in ech cuntre is eny relik had of hem, therfore it muste needis be more reson|able and more worthi that in dyuerse placis of cun|trees be maad ymagis of Crist crucified and of his modir Marie with purtenauncis therto longing, and that thei be housid and doon to as it is now bifore writun of the ymagis of othere Seintis. This reule or supposicioun hath withinne him sett forth suffi|cient euydencis for his proof, and therfore he is to be holde for trewe.
The iiije. reule or supposicioun is this: If bi the ymagis of which it [it is interlineated by a later hand.] is spokun in the next bifore going reule or supposicioun schulde be maad eny quyk and feruent and solempne and miche deuout remembraunce vpon the thingis spokun of in the firste and ije. bifore going reulis, thei mowe not be multiplied so wijde
