maist not aschape, but that therfore thou allowe and approue it to be a point of Goddis moral lawe and a point of his seruice; inlasse [Both here and elsewhere it is not very clear whether the scribe intended to write inlasse conjunctim or disjunctim.] than thou wolte refuse al what is writun in the Oold Testament for eny moral lawe, and if thou wolt so do, whi schalt thou and wolte thou so bisili and so feruentli and sturdili stonde vpon this text and processe writun Exodi xxe. capitulum. and Deut. ve. capitulum. Thou schalte not make to thee eny grauen thing, et cætera? If thou go fro oon such pro|ces of the Oold Testament writun thanne for a point and a gouernance of Goddis lawe, go thou fro alle other like; and thanne thou infirmyst and feblist bi a greet deel the euydencis whiche thou hast and holdist aȝens the hauyng and the vsing of ymagis. And ȝit, the sothe to seie, what Laban dide aboute the ymagis was bifore the lawe of Iewis; and therfore if the gouernaunce of Laban was good and alloweable, it was not reuokid, as was the gouernaunce and lawe of the Iewis.
vij. CHAPITER.
THE secunde principal gouernaunce to be tretid in this present secunde partie, of which gouernaunce manye of the layfe ouer myche wijten the clergie, is this: That pilgrimagis to dyuerse bodies and bonys of Seintis be mad, and also ben mad to ymagis of Crist crucified and of Marie and of othere Seintis; and namelich for that pilgrimagis ben mad into summe placis more in which ben ymagis of the crucifix and of Marie and of Seintis, than into summe othere placis in whiche ben like ymagis of the crucifix and of Marie and of the same othere Seintis.
