And so fynaly it is lad thus fer forth fro the bi|gynnyng of the iije. chapiter hidir to, that no doom of resoun werneth and lettith ymagis as now is seid to be had and to be vsid. And here yn eendith the proof of the ije. principal conclusioun.
v. CHAPITER.
THE iije. principal conclusion is this: It is not vn|leeful ymagis to be had and vsid as rememoratijf signes. This conclusioun y proue thus: What euer gouernaunce neither Holi Scripture, neither doom of resoun, neither mennys iust positijf lawe weerneth, is not vnleeful; but so it is, that for to haue and vse ymagis as mynding signes is not weerned bi Holi Scripture, as is open bi the firste principal conclusioun; neither it is weerned bi doom of resoun, as it is open bi the ije. principal conclusioun; neither it is weerned bi eny mennys iust positijf lawe, as it is open ynow to alle men. Wherfore this iije. principal conclusioun is needis trewe, that it is not vnleeful ymagis to be had and vsid as rememoratijf signes of God, and of his benefetis of Seintis, and of her conuersacioun.
The iiije. principal conclusion is this: It is leeful, in the maner of leefulnes spokun bifore in the firste chapiter of this ije. partie in the xe. reule or sup|posicioun, that ymagis be had and vsid as reme|moratijf signes in the maner now last bifore spokun. That this conclusioun is trewe, y proue thus: What euer gouernaunce is not vnleeful, is leeful in this maner of leefulnes, as it is open bi the now seid xe. reule or supposicioun: but so it is, that the now seid hauyng and vsing of ymagis is not vnleeful, as it is open ynouȝ bi the iije. next bifore going prin|cipal conclusioun. Wherfore needis folewith that this present iiije. conclusioun is trewe.
