of King Ezechie, that he brake the brasen serpent which Moyses lete make, Numeri xxje. capitulum., weerneth not ymagis to be mad and had and vsid in the chirche. Forwhi how schulde or myȝte thilk ymage haue be broke, but if he had bifore be? And therfore thilk proces rather confermeth ymagis to mowe law|fulli be, than that thei alle to be is vnleeful. Al that this proces wole or may dryue to is this: That ymagis mowe leeffulli be broke, whanne thei ben vsid in ydolatrie irremediabili, for so it was in the caas of the brasen serpent in the tyme of Ezechie, as the storie schewith; or at the leeste, that ymagis mowe leefulli be brokun, whanne more harme irreme|diabili cometh bi the hauyng and vsing of hem, than is al the good which cometh bi the hauyng [hauyng of hem, MS. (first hand).] and the vsing of hem; and more than this cometh not forth bi this [the, MS. (first hand).] proces of Ezechie, iiije. Reg. xviije. capitulum. And therfore thilk proces is ouerfeble forto weerne ymagis to be had and vsid, whanne thei ben had and vsid withoute ydolatrie, or with ydolatrie remediable, or with other harme remediable, namelich lasse than is the good comyng bi the vce of tho ymagis.
Finali, therfore, y mai conclude bi al what is seid fro the bigynnyng of the ije. chapiter in this present secunde partie hidir to, that Holi Scripture weerneth not neither reproueth ymagis to be had and be vsid. And sithen her with it is open, that neither long customed vce of bileeuyng in the chirche weerneth and reproueth hem, neither eny myracle doon bi God into her reprouyng reproueth or weerneth hem, it folewith that noon sufficient ground of feith reproueth and weerneth hem. And so is the firste conclusioun bifore sett sufficientli proued.
