graued ymagis in the chirche to be had and vsid, and that bi the seid text Exodi xxe. capitulum. and bi lijk text Deut. ve. capitulum., saue he which hath not therwith seen the othere now alleggid placis of Holi Scripture, (in which is conteyned also this word "graued thing,") and is therfore ouerhasti iuger and sentence ȝeuer, eer he haue seen al that ouȝte be seen bifore sentence bi the text Exodi xxe. capitulum. to be ȝouun? And alle such ouerhasti iugers and wijters God amende, for miche harme han thei doon. God lete hem do no more! Wolde God, that bi the schame which thei ben worthie in this partie for evidences now mad, thei wolden be waar of like defautis in othere maters forto iuge, eer thei ben ful leerned ther yn. Ferther|more, othere evidencis for myn entent in this mater and for confermyng of these here maad argumentis into the proof of the firste conclusioun y haue sett in the ije. partie of The donet into Cristen religioun, the [A space in the MS. for the number.] chapiter; se hem there who so se wole.
The ve. principal argument is this: If this word "graued thing" muste needis in the text of Exodi xxe. capitulum. and Deut. ve. capitulum. bitokene no thing ellis than a graued God, thilk text weerneth not graued ymagis to be had and to be vsid not as Goddis. This ech man wole sone graunte; but so it is that thilk word "graued thing" in the seid text Exodi xxe. capitulum. and Deut. ve. capitulum. muste nedis signifie and bitokene no thing ellis than a graued fals God, as now anoon after schal be proued. Wherfore nedis it muste be holde, (it may be noon otherwise,) that the seid text of Exodi xxe. capitulum. and Deut. ve. capitulum. weerneth not and reproueth not vtterli ymagis of God and of Seintis to be had and to be vsid. That the ije. premisse of this argument is trewe y proue thus: This word "graued thing" in
