persoones of the lay peple whiche ben clepid Lollardis, and forto make hem leue her errouris is a ful nota|ble, ȝhe, and an excellent remedie, the writing in her modiris langage of this present firste parti, and of the book clepid The iust apprising of Holi Scripture, and tho bookis of whiche mensioun is mad in these bokis, and the bitaking of these bookis and of tho bokis into her vce of reding and studiyng.
That this conclusioun is trewe y proue thus: For|to conuicte and ouercome tho seid erring persoones of the lay peple, and for to make hem leue her errouris, an excellent remedie is the dryuyng of hem into sure knowing or into weenyng or opinioun, that thei neden miche more to leerne and knowe into the profit and sure leernyng and knowing of Goddis lawe and seruice, than what thei mowe leerne and knowe bi her reed|ing and studiyng in the Bible oonli; but so it is, that forto dryue hem into the now seid knowing, trowing, or opinioun seruen at ful in an excellent maner the writing of this present firste parti in her modris lan|gage, with lijk writing of the book clepid Iust ap|prising of Holi Scripture; and bi so miche the better, if therto be sett the othere bokis named in these ij. And without the writing of this present first parti and of The iust apprising, or with out sum other writing lijk to hem, tho persoones wolen in no wise be so conuictid and ouercome, as assay therto mad bifore this present day thoruȝ this sixti wyntris by his ther yn vneffectual speding makith open experimental wit|nessing. Wherfore for to conuicte the seid persoones and forto make hem leue her errouris is an excellent remedie, (ȝhe, and as it were an vnlackeable remedie,) the seid writing of the now spoken bokis and the bitaking of tho seid bokis into the reeding and studi|yng of the same persoones.
The firste premisse of this proof and argument is trewe. Forwhi, if tho persoones were dryue into sure
