vnwise and vntrewe doomes upon prelatis of the chirche and vpon religiose persoones for chaunging of gouernauncis bifore doon and led and writen to be so doon, as y heere that thei doon; but thei wolden [wolde, MS. (first hand).] thinke that manye thingis musten be considerid mo than oon in iuging of a gouernaunce, and thei wol|den [wolde, MS. (first hand).] thenke that thei knewen not al that ouȝte be considerid aboute thilk gouernaunce or thilk gouer|naunce, as causes, motyues, ententis, helpis, lettis, lackis of meenis, chaungis of the better good which may not be differrid, neither mai be doon of othere men for the lasse good, and manye suche othere; and thanne thei wolden thenke and seie, that thei hadden not suf|ficient ground forto deeme and ȝeue iugement, whether thilk gouernaunce be good or bad.
And ferthermore, to seie redili as no man woot, how hard it is to clymbe vpon a tree or forto come doun of a tree, saue thilk that assaieth it; and no man loking vpon an other man so clymbing vp or comyng doun can iuge so weel that he gouerneth him weel or yuel in so ascending or descending as he him silf which so ascendith or descendith, neither he woot so weel as if he him silf were sett into lijk werke of clymbing or of doun comyng, and ful liȝtli ech such biholder schal deeme amys the clymber, if he make soone eny iugement ther upon without priuey counseil|ing with the clymber, to wite of him whi he is moved forto sette his foot rather there than here, and so of other [otherer, MS.] dyuersitees: euen so it is in oure now present purpos. And therfore not for nouȝt God seid in the Gospel, [Golpel, MS.] Matheu vije. capitulum.: Nile ȝe deeme and ȝe schulen not be deemed: in what euer doom ȝe schulen deeme ȝe schulen be deemed. Vpon which sentence it were good that men hem bithouȝte, and of which sentence it
