xiij. CHAPITER.
THE iiije. resoun is this: If suche as is bifore seid a voice was spokun in the eir, whanne Constantyn had maad at Rome the endewing which he made, thilk voice was so maad and spoken in the eir for this, that thanne first endewing by immovable pos|sessiouns entride into the chirche; or ellis for this, that thanne first greet habundaunt endewing bi im|movable possessiouns entride into the chirche.
Thou maist not seie that for the firste of these twei causis: For whi in the daies of First Vrban Pope, goostli fadir and techer of Seint Cecilie Virgyn, which was mad pope bi an hundrid ȝeeris bifore the popehode of Siluestre and the regnyng of Con|stantyn Empereour, the chirche of Rome was endewid with immovable possessiouns, as croniclis openli wit|nessen, and as it is open bi the writing of the same Vrban in the greet book clepid The decrees of Hiȝest