iugis, ȝit so muste thei be bi vce of the seid resoun and doom of resoun; and if this be trewe, who schulde thanne better or so weel vse, demene, and execute this resoun and the seid doom, as schulde tho men whiche han spende so miche labour aboute thilk craft? And these ben tho now bifore seid clerkis. And ther|fore, ȝe Bible men, bi this here now seid which ȝe muste needis graunte, for experience which ȝe han of the disturblaunce in Beeme, and also of the distur|blaunce and dyuerse feelingis had among ȝou silf now in Ynglond, so that summe of ȝou ben clepid Doctour|mongers, and summe ben clepid Opinioun-holders, and summe ben Neutralis, that of so presumptuose a cisme abhominacioun to othere men and schame to ȝou it is to heere; rebuke now ȝou silf, for as miche as ȝe wolden not bifore this tyme allowe, that resoun and his doom schulde haue such and so greet interesse in the lawe of God and in expownyng of Holi Scripture, as y haue seid and proued hem to haue.
And also herbi take ȝe a sufficient mark, that ȝe haue nede forto haue ȝoure recours and conseil with suche now biforeseid clerkis, thouȝ ȝe wolden la|bore, and powre, and dote alle the daies of ȝoure lijf in the Bible aloon. And drede ȝe of the effect which bifille to Bohemers for lijk cause, and mys gouernaunce in holding the first seid opinioun; and bi so miche the more drede ȝe thilk effect, bi how miche bi Crist it is pronouncid forto falle, where euer cysme and dyvisyoun is contynued; for he seith [Matth. xij.] [A space left in the MS. for the reference.] capitulum., that euery kingdom or comounte dyvidid in him silf schal be destruyed. But thanne aȝenward ȝe must [ȝe must interlineated in a later (?) hand.] be waar her of, that euen as oon sterre is different from an other sterre in cleernes, so
