feith and of sacramentis:) and ferthermore, sithen the seid sillogistik doom of resoun is a sure reule and vnfailing, and thouȝ the other reule which is resoun be failing at sum while, ȝit God wole haue a man ther yn excusid, and wole allowe thilke failingis whanne man bi his wil is not cause of thilk failing, noon inconuenient is thouȝ God ordeyned the seid resoun, and also his seid doom to be reulers of Holi Writ in alle now seid treuthis and conclusiouns tauȝt bi Holi Writ, thouȝ thilk resoun be at sum tyme failing.
And ferthermore for answere to it that the ije. ob|ieccioun alleggith Holi Scripture to be worthier than is the doom of resoun, and that therfore the [that the, MS. (first hand).] doom of resoun ouȝte not reule Holi Writt, it is to be seid thus: That Holi Writt mai be take for the outward lettris writun and schapun vnder dyuerse figuris in parchemyn or in velim, and forto speke of Holi Writt in this maner is not according to this purpos. For Holi Writt in this wise takun, is not holier neither better than eny other writing is [A later hand has joined writing is, so as to make writingis, but wrongly.] which hath lijk good ynke, and is lijk craftili figurid. In an other maner, accordingli to this present purpos, Holi Writt is takun for the kunnyng wherbi the thing is kunne which is signified and bitokened bi the now seid out|ward Holi Writt writun in parchemyn or velym, or ellis mai be take for the outward writing, as it signifieth hise trouthis bitokened bi it, and as it is ioyned and couplid with the kunnyng of tho treuthis signified bi the outward writing. Also it is to vndir|stonde that doom of resoun mai be take in ij. wisis pertinentli, and accordingli to this present purpos. In oon maner doom of resoun is the deede of resonyng in mannis resoun, bi which the power of resoun (or
