kunnyng of eny gouernaunce or eny trouthe schulde as miche or more come fro an other thing, as or than fro this thing which is seid to be his ground, thanne thilk other thing schulde be lijk miche or more and rather the ground of thilk gouernaunce than this thing schulde so be; and also thilk gouernaunce or trouthe schulde haue ij. diuerse groundis and schulde be bildid vpon ij. fundamentis, of which the oon is dyuers atwyn fro the other, which forto seie and holde is not takeable of mannis witt. Wherfore the first premisse of the argument is trewe. Ensaumple her of is this: But if myn hous stode so in this place of erthe that he not stode so in an othir place of erthe ellis, this place of the erthe were not the ground of myn hous; and if eny other place of the erthe bare myn hous, certis myn hous were not groundid in this place of the erthe: and in lijk maner, if this treuthe or go|uernaunce, that ech man schulde kepe mekenes, were knowe bi sum other thing than bi Holi Scripture, and as weel and as sufficiently as bi Holi Scripture, thilk gouernaunce or trouth were not groundid in Holi Scripture. Forwhi he stood not oonli ther on; and therfore the first premisse is trewe. Also thus: Ther mai no thing be fundament and ground of a wal, or of a tree, or of an hous, saue it upon which the al hool substaunce of the wal, or of the tree, or of the hous stondith, and out of which oonly the wal, tree, or hous cometh. Wherfore bi lijk skile, no thing is ground and fundament of eny treuthe or conclusioun, gouernaunce or deede, saue it upon which aloon al the gouernaunce, trouthe, or vertu stondith, and out of which aloon al the same treuthe or gouernance cometh.
That also the ije. premisse is trewe, y proue thus: What euer deede or thing doom of resoun dooth as fulli and as perfitli as Holi Scripture it dooth, Holi Scripture it not dooth oonli or al oon; but so it is, that what euer leernyng and kunnyng Holi Scripture ȝeueth upon eny of the now seid gouernauncis, trouthes, and vertues, (that is to seie, upon eny gouernaunce, trouthe,
