Þer-in þe keruer a lofe schalle sette,
To serue god fyrst with-outen lette;
Line 732
Þese oþer lofes he parys a-boute,
Lays hit myd dysshe with-outen doute.
Þe smalle lofe he cuttis euen in twynne,
Þo ouer dole in two lays to hym.
Line 736
The aumenere a rod schalle haue in honde,
As office for almes, y vndurstonde.
Alle þe broken met he kepys y wate,
To dele to pore men at þe ȝate,
Line 740
And drynke þat leues serued in halle;
Of ryche and pore bothe grete and smalle.
He is sworne to ouer-se þe seruis wele,
And dele hit to þe pore euery dele;
Line 744
Seluer he deles rydand by way;
And his almys dysshe, as I ȝou say,
To þe porest man þat he can fynde,
Oþer ellys I wot he is vnkynde.
Line 748
¶ De ferculario.
¶ This wyle þo squyer to kechyn shalle go,
And brynges a bof for assay þo;
Þo Coke assayes þe mete vngryȝt,
Þo sewer he takes and kouers on ryȝt;
Line 752
Wo so euer he takes þat mete to bere,
Schalle not so hardy þo couertoure rere,
For colde ne hote, I warne ȝou alle,
For suspecyon of tresoun as may befalle.
Line 756
Yf þo syluer dysshe wylle algate brenne,
A sotelté I wylle þe kenne,
Take þe bredde coruyn and lay by-twene,
And kepe þe welle hit be not sene;
Line 760
¶ I teche hit for no curtayse,
But for þyn ese.
When þe sewer comys vnto þe borde,
Alle þe mete he sayes at on bare worde,
Line 764
