Then drawe on his sokkis / & hosyn by the fure,
his shon laced or bokelid, draw them on sure;
Line 896
Strike his hosyn vppewarde his legge ye endure,
þen trusse ye them vp strayte / to his plesure,
Then lace his dublett euery hoole so by & bye;
on his shuldur about his nek a kercheff þere must lye,
Line 900
and curteisly þan ye kymbe his hed with combe of yvery,
and watur warme his handes to wasche, & face also clenly.
Than knele a down on youre kne / & þus to youre souerayn ye say
"Syr, what Robe or govn pleseth it yow to were to day?"
Line 904
Suche as he axeth fore / loke ye plese hym to pay,
þan hold it to hym a brode, his body þer-in to array;
his gurdelle, if he were, be it strayt or lewse;
Set his garment goodly / aftur as ye know þe vse;
Line 908
take hym hode or hatt / for his hed cloke or cappe de huse;
So shalle ye plese hym prestly, no nede to make excuse
Wheþur hit be feyre or foule, or mysty alle withe reyn.
Or youre mastir depart his place, afore þat þis be seyn,
Line 912
to brusche besily about hym; loke all be pur and playn
wheþur he were saten / sendell, vellewet, scarlet, or greyn.
Prynce or prelate if hit be, or any oþer potestate,
or he entur in to þe churche, be it erly or late,
Line 916
