How the Wise Man tauȝt His Son. [[Lambeth MS. 853, ab. A.D. 1430, page 186.]]
LIstniþ lordingis, & ȝe schulen here
How þe wise man tauȝt his sonne,
And take good tent to þis matere,
And lerne it also if ȝe kunne.
Line 4
Þis song was maad bi good resoun
To make men true and stidfast;
And whanne a þing is weel bigunne,
It makiþ a good eende at þe laste.
Line 8
Ther was a wise man tauȝt his child
While it was ȝong and tendir of age;
Þe child was boþe meeke & myelde,
Faire of body and of visage;
Line 12
To leerne it hadde a good corage,
And to al goodnesse a greet desire;
With good ensaumple and faire langage
His fadir tauȝt him weel and faire,
Line 16
And seide, "my sonne, take good hede,
Bi þe morewe euery day
Or þou do ony wordli deede,
Lifte vp þin herte to god, & pray
Line 20
Deuoutly as þou can or may [page 187]
Þat þou in grace þi lijf may lede,
And synne to flee boþe nyȝt & day,
Þat heuen blis may be þi mede.
Line 24
