pertinences, he grauntyd to be had & to be holde, to þe fore|seyde abbas & to her successours, & to the couent of þe same place, quietly, frely, pesybly, & holly, in perpetuell ryht, paynge þer-of yerly to hym & to hys heyrys j. d in þe feste of seynt myhel for all seculer seruice, exaccion, & demaunde: for þe whyche gyfte, graunt, & confirmacion, þe fore-seyde Abbas, with assent & consent of all þe couent of þe same place of Godestowe, gaf to hym vj acris londe in a felde þat is callid þe breche, lyinge by-twene þe londe þat thomas pykeforde helde of the foreseyde Abbas & þe wode þat is callid þe fryth, in-to an eschange of þe foreseyde crofte þat is callid preuet croft: & þe seyde Iohn franckeleyn and hys heyris warantiȝed, acquited, & defendyd for euer, þe seyde crofte, with alle hys pertinences, to þe foreseyde Abbas & her successours, a-geynyste all pepuls: & þat hys graunt, gyft, & confirmacion, sholde be sure & stable for euyr, he strengthyd hyt with þe preynt of hys seele: & is with-oute date.
1284/5, Feb. 25. Grant to Godstow, by Nicholas and William of Clere, of 8s. rent|charge over the lands of the serf John Aylmer. Powers of distraint.
THE sentence of thys euidence is, þat Nicholas & william of kynges Clere, brethyrn, & her heyrys, byn holde & bounde to þe religius women þe Abbas & couent of Godestowe in viij shillings of sterlynges, yerly to be payd to hem in þe feste of seynt Myhel, for Iohn I-callid Aylmer, sum-tyme her bondeman, þe whych þey gaf to þe seyde Nicholas & Iohn, with all hys goodys & catall & londis þe whyche he hylde a-fore of þe seyde Abbas & couent, as hyt is conteynyd fully in þe chartur of þe refeffement þat þe seyde Abbas & couente made to hem vppon these thynges: & they wyllyd & grauntyd for hem & for her heyrys, by the tenowre of þys present wrytynge, þat hyt sholde be leffull to þe seyde Abbas & Couent to entre & occupe as her owne þe seyde londys & oþer thyngys þat þey had at þat tyme & were to haue afturwarde in þe towne of kynges Clere, & also to reseyue all the avaylys of the same frely & with-out a-geyn seynge of ony man, & to make distreynynge as they wolde for þe seyde rent, as ofte as hyt cesyd to be payd. They willid also & grauntyd for hem & for her heyrys þat þe shreue of wynchester, þe whyche
