1304, July 20. Grant by Godstow, to William, carpenter, and his heirs, of the mill. Quit-rent, 30s. yearly. Obligation to keep in repair, and to rebuild, if destroyed by flood or fire. Liability to distraint.
THE sentence of þis endenture is, þat þe xxxij. yere of þe reine of kinge Edwarde, vppon seint margaretes dai virgin, hit was a-cordid [folio XLIb(51b)] bitwene þe religius ladiis, dame Aliȝ Gorges, bi þe grace of god abbas of Godestowe, & þe couent of þe same place of þe on parte, & william of Framton, I-callid carpinter, of þe oþer: þat is to sei, þat þe fore-seide abbas & couent gaf grauntid & toke to þe seide william & to his heiris here mille of framton, with all his pertinences, seutis, & liberteis, to be had & to be holde, to him & to his heiris, freli quietli & for riht heritage for euer, of þe chife lordis of þe fee, doinge to hem seruices dewe þerof & I-wonid, painge þerof yerli to þe seide religius ladijs xxx. shillings of siluer, þat is to sei, at candelmasse, xv. shillings, & at midsomur, xv. shillings, for all seruices & seculer demaundis: & þe fore-seide religius abbas & couent warantiȝed & defendid to þe fore-seide william & to his heiris or assinis þe fore-seide mille with all his pertinences bi þe fore-seid seruices of xxx. shillings: & if hit happinde þat þe fore-seide william cese in his paiment, in all or in parte, or þat þe fore-seide mille be drownid, brennid, or distruid bi defaute of amendinge to be do here-aftur in oni wise, he bounde himselfe his heiris & all his londis & tenementes þat he had or miht haue in þe towne of framton & in all oþer places in þe shire of Glowcetur & also in all þe sheres of Inglonde to þe distressinge of þe attornei of þe seide religius women abbas & couent þat he miht distresse & kepe the distressis or sille hem also ofte as hit is cesid in þe paiment of þe seide rent, & þat þe fore-seide attornei (þe wiche þat þe seide religius women sende or make attornei bi her opin writinges) haue of þe goodis of þe seide william for euiri distreininge I-made j halfe marke for her harmis & expenses. In-to witnes of þis, þei put to þis writinge endentid her seelis, euirich a-geiniste oþer: & is with-oute date.
1312, April 4. Confirma|tion to Godstow, of the quit|rent (as in no. 161), by Robert son of Pain, lord of Frampton, on his ac|quiring the mill from William, carpenter. Powers of distraint.
THE sentence of þis composicion is þis, þat how william I-callid carpinter, of þe towne of framton, gaf to Robert fitȝ
