XVII.

Now haue we deuisid þe ordir of þe salmis on þe niht, at matins. Loke we now tyl þe vris þat folihis. At prime þre salmis ilkain by þam ane. Þe ymne of þis ilke vre sal be saide efter þis verse: "Deus in adiutorium meum," Are ye beginne te salme. when þe þre salmis ere saide, a lescun sal be red, and siþin þe vers, And "Kyryeleison," and finist þe hure. Vndern, Midday, Noon wid þat ilke ordir be sungen, þat is, wid vers, wid ymnis þat fallis to þaim, þre salmis, and lescuns, and vers, and "Kyryeleison"; And sua finise þe vres. Þe salmis sal be sung wid antefens, yef þe cuuent be mikil; And yef þai be fa, saie it plane forde. Bot euensang sal be saide wid foure salmes And te Antefens, And efter þe salmis A lescun, & siþin þe respun, and siþin þe ymne and te verset, þe cantikyl of þe gospel, and te letanie, And syþin þe "Pater noster." O þis maner sal þe vris be sent forde. Cumplin [folio 16b] sal be saide wid þre salmis wid-vten antefens, & siþin þe ymne þat fallis þar-to, A lescun, and te verset, & siþin "Kyryeleison," and te benicun, and sent forde þe vris til god.