Ȝyf hyt be shewed here apert,
Yn ouþer stede hyt ys couert;
Line 12452
And ȝyf þou hydë here þy blame,
hyt shal be shewed to þy shame.
Seynt Austyn seyþ a wurde to charge,
Of Goddys ȝyfte, how hyt ys large:
Line 12456
"Shryueþ ȝoure dedës and ȝoure þoȝt,
For God forȝyueþ alle or noȝt;
Oþer forȝyueþ he alle with gladehede,
Or alle abydeþ to hys wraþhede.
Line 12460
Ȝyf þou be allë fully shryue,
Forsoþe þan be þey all forȝyue;
Ȝyf þou þe shryue of alle but one,
Noþer he forȝyueþ þat, ne none."
Line 12464
Yn ryȝt resun þese clerkys telle,
yn þat stede þere God shal dwelle [folio 83a]
Plenerly, hyt behoueþ be clene,
Þat no synnë mowe be sene.
Line 12468
whan synne ys shryue, and clene eche deyl
Þere wyl God, holde hys hostele;
Þe mantel of loue ys leyd ful euene,
Þat heleþ Ihesu and kyng of heuene.
Line 12472
Yn o stede ne mowe þey reste;
God or þe fendë, outë [þe toon oute O.] keste;
One of þese, behoueþ þe chese;
Take þe toon, þe touþer þou lese.
Line 12476
Y wulde holde hym more þan wode,
Þat cheseþ þe wykked, and leueþ þe gode.
Take we God on oure party,
And fle we þe fendës cumpany.
Line 12480
That þou make no skornyng yn shryfte.
Skorne nat, and seye þou wylt forsake
Þy synne, and eft aȝen hyt take.
