A kandelstyke stode þe kyng before,
Þat oute of Ierusalem was bore;
Þe kyng lokede to þat candelstyke,
And sagh besyde a grete ferlyke:
Line 9376
Vndyr þe kandelstyke, a lytel logh,
He sagh an hande wryte on þe wogh;
No morë he sagh þan þe hande,
But þe lettres were weyl farande;
Line 9380
he redde hyt as he sate on þe des,
"Mane. techel. fares. [phares.] "
No more þyr was þere wryte;
On englys þus ys hyt to wyte,
Line 9384
'To mornë shal [shal þe.] departyng be,
Of þy ryche kyngdom fro þe.'
Þe kyng vndyrstode no þyng of þys,
Ne none of hysë coude hym wys.
Line 9388
As he þys hand began to holde,
hys herte bygan to tremle and colde;
he shewed hyt to alle hys ássemble,
And crydë hyt þurgh [þurghe out.] þe cyte,
Line 9392
'Þat ȝyf any coude do hym to wyte,
what hyt mente, þat þere was wryte,
He shulde haue of hym grete mede,
Þat coudë vndo þat yn dede.'
Line 9396
But none of alle, forsoþe to wene,
Coude telle þe kyng what hyt wlde mene.
But þe quene seyd sone anone:
"Syre kyng, y wotë where ys one,
Line 9400
Þat kan do ȝow alle to knowe [folio 62b:2]
what ys wrytë on þe wowe.
yn þys cyte, yn a strete,
woneþ a ful wys prophete,
Line 9404
hys name men callë Danyël,
he shal vndo þe wrytyng wel."
Þe kyng aftyr Danyël sente,
And þe prophete to hym wente;
Line 9408
