"By þe leued wode rode Beuolyne,
wyþ hym he leddë feyre Merswyne;
why stondë we? why go we noght?"
Þys ys þe karolle þat Grysly wroght.
Line 9052
Þys songe sunge þey yn þe chercheȝerd,—
Of foly were þey no þyng aferd,—
Vn-to þe matynes were alle done,
And þe messe shuld bygynnë sone.
Line 9056
Þe preste hym reuest to begynne messe,
And þey ne left þerfore, neuer þe lesse,
But daunsed furþe as þey bygan; [folio 60b]
For alle þe messë þey ne blan.
Line 9060
Þe preste, þat stode at þe autere
And herde here noysë and here bere,
Fro þe auter down he nam,
And to þe cherchë porche he cam,
Line 9064
And seyd, "on Goddes behalue, [halfe.] y ȝow forbede
Þat ȝe no lenger do swych dede;
But comeþ yn, on feyre manere,
Goddës seruysë for to here,
Line 9068
And doþ at Crystyn mennys lawe;
karolleþ no more for Crystys awe,
wurschyppeþ hym with alle ȝoure myȝt,
Þat of þe vyrgyne was bore þys nyȝt."
Line 9072
For alle hys byddyng, lefte þey noȝt,
But daunsed furþ, as þey þoȝt.
Þe prest þarefore was sore a-greued,
he preyd God þat he on beleuyd,
Line 9076
And for seynt Magne, þat he wulde so werche,
yn whos wurschyp, sette was þe cherche,
Þat swych a veniaunce were on hem sent
Are [Ar.] þey oute of þat stedé were went,
Line 9080
Þat þey [þey O, om. H.] myȝt euer, ryȝt so wende
Vnto þat tymë tweluemonth ende:
