For at hym þey lernë alle
To temptë men yn synne to falle.
Line 8886
To synne þey calle men, alle þat þey may,
why shuld þey ellës make hem so gay?
For no-þyng elles are þey so dyȝt,
But for to blyndë mennës syȝt.
Certes hyt semeþ, at alle endes,
Þat many of hem are but fendes.
Line 8892
And ȝe clerkes [clerkes ȝow.] nedeþ to be wyse,
Ȝow nedeþ cune ȝow [cunne ȝoure.] self chastyse;
Ȝe mowë se yn holy wryt
How ȝe shul kepe ȝoure ownë wyt.
Line 8896
whan ȝe at Goddës seruyse are,
Ȝe shul nat þan aboute ȝow stare,
Specyaly wymmen to be-holde,
Ne for to Iangle wurdës bolde.
Line 8900
Clerk with skyl shulde be pryue,
And nat yn cherche of wurdës fre;
Ne dysturble men with hys rage,
For hyt ys called [callede al.] sacrylage.
Line 8904
kepe þy body yn cherche fro synne,
Þy menbrys and þy wyt with-ynne;
Specyally þy þoȝt and þy syȝt, [folio 59b]
Þan may þy preyer be made alle ryȝt.
Line 8908
Also hyt ys vyleynye to werche,
A lewed man to plete yn cherche,
lay courte, or elles counte,
Þer any man myȝt dampned be;
Line 8912
Ne quest take of endytëment
yn holy cherche, oþer ȝerde purseynt; [pursent.]
Ne sysours oght nat to enquere
Of felonye, ne of þeftë þere;
Line 8916
Þou þat hym wreyest, þou mayst weyl se
Þou demyst hym with þat ys yn þe.
Ȝyf þou yn cherche dest any of þyse,
Þou trespast aȝens þe fraunchyse.
Line 8920
Ȝyf þou euer hauntedest swych outrage,
