He seyþ nat, to whom he [whom þat he.] wyl kalle,
But spekeþ comunly to vs alle;
And þogh he calle alle comunly,
Sum are called more specyally;
Line 7552
For specyaly þat comandeþ he
To men þat are of hygh degre,
As to bysshopes, and persones,
To prestys, and ouþer relygyons; [relygyones.]
Line 7556
To þese ys specyal comaundement;
Þurgh þese to ouþer hyt shal be sent.
Þarefore he byddeþ, with wurdës smarte, [smerte.]
Þat þey be allë chaste of herte.
Line 7560
what ys hyt wurþ [wrth.] to be, with-outen, clene,
whan fylþë ys withynne þe sene?
For many one, whan þey to bedde are broȝt,
Delyten hem yn fylþys of þoght.
Line 7564
Swych þoghtës are synnës greue,
Ȝyf þey þè pay, or be þè leue;
And ȝyf hyt pay þè so, swych foule þoȝt,
Þat þe dede were do, ȝyf þou moght,
Line 7568
Certes hyt ys nat [noght.] to drede
Þat þy wyl ne shal answere for þe [þy.] dede.
For ȝyf þou myȝtyst, þou wuldest, do,
Þy wyl consenteþ weyl þarto;
Line 7572
Þou art a lechoure yn þat kas,
Þyn hertëwyl ys grete trespas.
Anoþer spyce, more synne hyt ys, [folio 50b:2]
whan þou sekest þy wyl of flesshe,
Line 7576
To þe lust of lecchery,
Yn handlyng, or dremyng of foly,
Þurgh þoghtes or syghtës þat þou sees,
And yn alle ouþer pryuytes;
Line 7580
God hym-self forbedeþ alle þys;
Þey gete no parte of heuene blys:
Yn shryfte forgetë noght of þyse;
How ofte þou dedyst, and on what wyse.
