So wyl ȝyftys louë tylle,
And gadyr many one to gode wylle.
Line 7092
For ȝyftys, twey loues mayst þou haue,
And boþe be [by.] tymës mow þe saue.
Þe fyrst ys, ȝyf þou ȝyue þy þynges
To hauë louë of lordynges:
Line 7096
For þy ȝyfte þou mayst be herde,
And saue þy godë yn þe werlde;
But þat love lasteþ lytyl whyle,
And aȝens God hyt wyl þe fyle.
Line 7100
Þe toþer loue is noght for þys;
Hyt askeþ noght but heuene blys;
And þat loue ys, euery deyl,
loue of God and pore man weyl.
Line 7104
what ys loue vnto men pore?
Almës to hem ys recouere;
Almës dede of loue ys wey,
Noþer mysdo, noþer [hem no.] myssey;
Line 7108
Þan wyl God almyghty loue þe;
Þy loue ys þan with charyte.
Charyte ys, þe certeyn to lere,
loue of þyn euyncrysten dere.
Line 7112
So sone þerto, noght wyl þe lede,
Ne so moche, as wyl almës dede.
Charyte ys, þe longyng of loue,
As y haue tolde ȝow here aboue;
Line 7116
For alle þat euer þou mayst do,—
But loue yn charyte be þerto—
Alle þat euer hast þou wroght, [folio 47b:2]
Stant þe ellës al at noght.
Line 7120
Se now what seynt Poulë seys
Yn a pystyl, þe samë weys,—
"Þogh y speke as weyl with tung [tounge]
As any man or aungel haþ song, [sounge.]
Line 7124
And y lyue nat with charyte,
No þyng auayleþ hyt to me.
For y do þan ryȝt as þe bras,
And as þe tympan, þat bete was;
Line 7128
