with-outyn ende yn ioye to be,
For þrytty poundë þat he boghte,
And to almës dede hem broghte."
Line 7056
And Troylë waked sone anone,
And tolde hys dremë to seynt Ihōn, [Johone.]
Euery deyl how he hadde sen,
And was ordeyned to haue [ha.] ben.
Line 7060
"Þarfore," he seyde, "fro henne forward
Ne shal y neuer be to pore man hard;
So feyre ys dyȝte to hem to lyue,
Þat blely wyl to pore men ȝyue."
Line 7064
But algate Troyle þat tyme had tynte
Þe fyrst paleys þat God hadde hym mynte.
Ȝe lordynges þat haue y-now,
Þys talë haue y tolde for ȝow,
Line 7068
Þat ȝe ne repente ȝow of largés
Þat ȝe ȝyue to ȝoure almés;
And þenkeþ on þe bysshope Troyle
Þat for large almës made grete doyle,
Line 7072
Þat ȝe ne lese nat þat paleys
Þat God ordeyneþ to alle curteys;
For who so ȝyueþ [ȝyfth.] curteysly,
Hyt fordoþe þe synne of glotonye.
Line 7076
Of mete, glotonye wyl bygynne;
Almës þerof fordoþe þat synne.
Almës fordoþ alle wykkednes,
Line 7079
And quenchyþ synne, and makyþ hyt les.
Almës semeþ hyt cumþ of loue [folio 47b]
Þat þou ȝyuest [ȝyfst.] to man for God aboue,
Oþer for hym þat þou ȝyuest þore,
Or hym þat þou ȝyuest [ȝyfst.] hyt fore.
Line 7084
Almës, þou wost weyl, ys a ȝyfte;
And for þe ȝyuyng, man ys vplyfte.
Ȝyue gladly, for God, þyn almës here;
Hym ȝyue þou hyt on alle manere,
Line 7088
And for hys loue, to hys meyne,
Ȝyf þou of hym wylt loued be.
