with wykked man, þou turnest as he."
Line 6584
On þese wurdys y rede ȝe þynke,
And kepë ȝow fro cursed blynke.
Ne þou shalt, for no mannes prew, [folio 44a:2]
Ete, no drynkë wyþ a Iew.
Line 6588
But ȝyf he wyl crystendom take,
hys felaushepe shalt þou forsake.
And þat ys a grete skyl why,
For þe Iew ys Ihesus enmye.
Line 6592
Þe Iew loueþ, on no manere,
Iesu, ne hys modyr dere.
Þarfor, ȝyf þou loue hem ryȝt,
Forsakë Iew at alle þy myȝt,
Line 6596
But ȝyf þou hope þat he wul weyue [forsake]
Hys lawe, and crystendom receyue.
[Against making Men drunk.]
Þys custum ys also [also ys.] perylous,
To lede a man to þe alehous
Line 6600
To do hym drynke out of resun,
Or make hym drunke,—þat ys tresun,—
Or to þy [þyn.] hous, ȝyf þou hym lede,
On hym drynkë for to bede;
Line 6604
Þou art gylty of hys synne
Ȝyf þou to drunkenes wldest hym wynne.
And ȝyf þou ioyë þerof has,
Þe more þou fallyst yn trespas;
Line 6608
Hyt ys a tokene of felunnye
To weytë hym with swych gylrye.
Also ȝyf þou any day shuldest [shulle.] fast,
And þou ouertymely þy metë aske,
Line 6612
Glotony haþ swych longyng wroght,
Þat þou to tyme abydest noght.
