Dette and soule þey þynke al quyt.
loke þerfore, executore,
Ȝyf þou haue ȝyt hold yn store
Line 6244
Þat þou oghtest for to haue ȝyue, [folio 42a]
But fro day to day hast hyt dryue:
Þou synnest þan wykkedly,
And doust þe soule treytory;
Line 6248
But þus seyþ holy story,
Þe soule þat ys yn purgatory
lokeþ fast aftyr þe socoure
Of þe gode executoure;
Line 6252
Ȝyf he hyt helpë for to saue,
Gretë mede þan shal he haue;
And ȝyf he do nat hys ordynaunce,
hyt askeþ of God to hym veniaunce.
Line 6256
Of allë fals þat beryn name,
Fals executours are maste to blame.
þe pope of þe courte of Rome,
Aȝens hem ȝyfþ he hardë dome,
Line 6260
And curseþ hem yn cherchys here
Fourë tymës yn þe ȝere.
Of alle executours þat men fynde,
werst are þyn ownë kynde,
Line 6264
And þy chyldryn specyaly
Are to þy soule vnkyndëly:
Þy chyldryn allë sey ryght þus: [ryght þus O, þus H.]
"whom shuld þey ȝyuë hyt, but vs?"
Line 6268
y graunte weyl hyt ys ȝyue to þe;
Be þou to hem þan sumwhat fre:
Þat was heren, now hyt ys þyne;
helpe hem þerwyþ oute of pyne;
Line 6272
But þou mayst nat, for auaryce,
Þat haþ þe boundë yn þat vyce,
To sparë no þyng þat was hys
For to bryngë hym to blys.
Line 6276
