Þat befyl to any man,
Of grete enuye hyt fyrst began.
Ȝyf þou euer haddyst sorow oþer [&.] kare
Of þy neghëburs welfare,
Line 3928
Enuye haþ þe yn hys hand
Boundë wyþ þe deuylys band.
Ȝyf þou forþenke a mannys prowe,
Þat he haþ hegher state þan þow
Line 3932
Yn any manere of dygnyte,
Þat he may to, auaunssede be;
Þogh þou come nat to hys state,
But wust apeyre hyt and abate,
Line 3936
Þat he may nat haue hys baylè, [baylye.]
Dedly synne ys swyche enuye.
Ȝyf þou make one so hard stresse
Þat hys godnesse wexe þe lesse,
Line 3940
Or ȝyf þou euer yn placë were
Þat hys harme þe morë were,
Shryue þe wel ar þou deye,
For al þys cumþ of grete enuye.
Line 3944
Ȝyf þou euer on any manere
Lettydyst any man for to lere
Craftë, or [or any.] ouþer queyntyse,
But fordeddyst hys apryse [lernyng,]
Line 3948
For þou shuldest furþeryd be,
And more yn prys preysed þan he;
Beþenke þe weyl, ȝyf þou do þus,
Þat þyn herte ys ful enuyus;
Line 3952
For þou shalt neuere, with gode ye,
Se hym þat leryþ þy maystrye.
Ȝyf þou be enuyus, and no man trowe, [folio 27a]
And behynde hys bak make hym þe mowe,
As who seye þat "he naght can,
Line 3957
No ys wurþ as a-nouþer man,"
