But ouer mesure ys nat cunnaunt. [couenaunt. Glossed 'semely.']
Line 3232
Of ladyys wulde y leue my sawe, [folio 22a:2]
But y dar nat for goddys awe; [drede]
Of hem behoueþ to sey sumdeyl,
yn what poyntës þey do nat wel.
Line 3236
God haþ shewed, and sheweþ euery day,
Þat swychë pryde ys noght to pay.
A tale y shal þerforë telle, [A tale]
How a lady was pyned yn helle.
Line 3240
[The Tale of the Proud Lady, who was burnt to ashes again and again in Hell by a Burning Wheel.]
þer was a lady, a lordys wyfe,
here fayrhede was yn renoun ryfe;
Moche she loued feyre tyfyng, [tyffynge.]
On here hede, ouer al þyng,
Line 3244
For to be holde þe feyryst lady
Of al þo þat woned here by;
And whan she wened best [best wende.] to haue lyuyd,
Þe deþ here toke; here dayys were fyllyd;
For when men wene to lyfe haue space,
Þan ys deþ sunnest yn place.
Whan she was dede, sone aftyrward
here squyer toke a syknes hard,
Line 3252
Þat here lorde helde of grete prys,
For he was a man yn seruyse wys.
As he lay yn hys bed a nyȝt,
hym þoght hys lady come to hym ryȝt,
And seyd þus, "rys, and go wyþ me,
Line 3257
A merueyle shal y shewe to þe."
