¶ The þridde Chapitele of þe furste techynge is of Intencioun off a Surgyne.

Alle þe entencioun of surgerye, how dyverse þat it be, yt is on *of þre maneres: þe ffurste ys undoynge þat þat is hol; secunde ys helpynge of þat þat is tobroke; þe þridde ys remevynge of þat þat is to myche, so þat it be do with hande crafte; ffor alle þe entencioun of a surgien ys vndire one of þis þre entensiouns, oþere ellys vndire one of hem. A surgyne vndoþ þat þat ys hol, whanne he letyth blod ore garsyth oþere brenneþ, oþere setteþ on waterlechys,Page  19 ffor þis ys a surgyns craft, þawȝ we for oure pride have y-lefte yt to laborers & to wommen, for Galien & Rasys dyden it wiþ here handes as here bokys tellyþ. And we vndoþ þat þat is hol, whenne þat we kutteþ þe veynes þat ben in þe templys & þe forhed, & makyth cauterisaciones from þe seknesse of þe eyȝen, & whenne þat we maken Cauteries in þe hed & in dyverse places of þe body as y schal telle in þe chapitell of Cauterysynge. Þe secunde entencioun ys to hele þat þat is tobroke as: woundes, olde woundes, ffestres, Cancres, and in bringynge to here place Ioyntes þat bene oute, & in helynge bonys þat ben tobroken. Þe þridde entencioun is to remevyn þat þat ys to myche as scurffyls of þe hed & þe nekke, & oþere partyes of þe body, & Cataractis þat ys a water þat comyth bytwene þe whyte of þe eyȝe & þe Appul. Sebel þat beþ veynes þat buþ in þe whyte of þe eyȝe, & beþ ful of blod. Vngula, [folio 38b] þat ys a thynge þat bygynneþ by þe nese & goth overe þe eyȝe, tyl he keffere alle þe eyȝe & knottes þat ben in þe eyȝe, & oþere seknesse of þe eyȝe, & in doynge awey polippes þat is flesch þat growiþ with ynne þe nese, wertys & wennys, fficus þat is a superffluyte þat growiþ vp on þe skyn off þe pyntellys hed withouten, emeraudes & a schynPage  20 þat enclosyth a wommans prive membre, þe sixte fynger of þe hand, and manye superfluytes þat beth nought semlye to mannys body.