Lanfrank's "Science of cirurgie". Edited from the Bodleian Ashmole ms. 1396 (ab. 1380 A.D.) and the British museum Additional ms. 12,056 (ab. 1420 A.D.) by Robert V. Fleischhacker, DR. PHIL. Part I--Text.

[folio 2b] Now þese chapitles of þis book ben y-ordeyned, I wole fulfille my purpos pursuynge ech chapitle bi ordre, & confermynge my wordis aftir þe auctorite of myn auctouris and wiþ experiment þat I haue longe tyme vsed wiþ þe help of god. // // //

Al þing þat we wolde knowe, bi oon of .iij. maners þat we moun knowe, eiþir bi his name, or by his worchinge, or bi his verri beynge schewynge propirte of him-silf / In þis þre maner we moun knowe surgerie bi expownynge of his name; for siurge comeþ of siros, þat is a word of gru, & in englisch siros is an hand, & gyros gru, þat is worchinge in englisch / For þe ende & þe profite of syurgie is * [of hand-wyrchynge. Of þe Name of a thynge Galyen seyth: he þat wyl knowe] soþfastnes of a þing, bisie him nouȝt to knowe þe name of a þing, but þe worchinge & þe effete of þe same þing / Therfore he þat wole knowe what siurgie is, he moot vndirstonde, þat it is a medicinal science, which techiþ us to worche wiþ handis in mannes bodi, wiþ kuttynge or openynge þe

parties þat ben hole & in helynge þo þat ben broken, or kutt, as þei were toforn, [folio 3a] or ellis as nyȝ as a man may, & also in doynge awey þat is to myche skyn: as wertis or wennys, or þe fleisch to hiȝe //