Oure lord schal come & smyte adoun; as liȝttyng doþ to ground,
Þere þat he to heuen stiȝe; with his bledyng wounde. [MS. woudē]
An Aungel schal þe spere & þe nails; & þe crovne of þorn,
& þe rood þat he died on; with hym bringe aforn.
Line 28
In þe vale of Iosephat; his dom he wil do;
Þe best man schal sore agrise; þat schal come þerto.
Leuere had his owen moder; in helle pyne to be,
Al þe while þe dom ylast; þan her sones face to see.
Line 32
Allas! hou schull we þan ouercome; þilk griselich fere,
Whan vche seint schal aferde be; oure lord crist to see þere?
OVre lord wil schewe his bitter woundes; And Sigge, "Man! for þe,
Line 35
Look what ich haue ysuffred; what hastow suffred for me?"
Mest he wil vnderstonde þere; þe vij. merciful dedes:
Who þat haþ hem here ydo; as he with his mouþ sede,
Þe hungri forto fede; & schride þe cloþles,
Ofte goo to sek men; & herberewe þe housles,
Line 40
Þe dede forto bury,; þe bounden to vnbynde,
Þai þat þise on erþe loueden; þere hij schullen it fynde.
OVre lord wil to þe liþer sigge; as we reden in gospelle,
"ȝe cursed gostes, goþ; in-to þe pyne of helle!"
Line 44
Þe deuelen willen come ȝernend; & speten fire & blast,
& taken þe wrecched soulen; & in-to pyne hem cast.
OVre lord wil to good men sigge; "in my riȝth honde ȝe come,
And afongeþ my fador riche; þat aȝeins ȝow is ynome,
Þat to ȝou was ymaked; bifore þe werldes biginnyng;
Þere ȝe schullen be in ioye with me; wiþ-outen any endyng."
In þis book we finde ywrite; þat þre manere folk schal saued be,
Maidenhod & spousehod; & widewehode: þise þre.
Line 52
Ich bid hym þat vs deme schal; kyng of all kynge,
Among his blissed sones; oure soules to heuen brynge. Amen.
Off ioye & blisse is my song; care to bileue,
& to herie hym among; þat al oure sorouȝ schal reue.
Line 4
Ycome he is, þat swete dew; þat swete hony drope,
