[Laud MS. 622, leaf 70, back, col. 2.]
¶ ffiftene toknes. ¶ Ieremie.
SEint Ieremie telleþ in his book; of xv. tokenyng
Þat god wil aȝeins domesdai; here on erþe bring:
Þe first day þe Cee schal arise; & as a wal stonde,
Wel heiȝer by .xl feet; þan any hil in þis londe.
Line 4
Þat oþer dai, it schal so lowe aliȝt; þat vnneþe men schul it se;
Alle þe fissches þe þrid day; abouen þe water schull be,
& so reuly a cri ȝiuen; þat all men schullen haue fere;
Þe fierþe day, water schal brenne; as þeiȝ it coles were;
Line 8
Þe vte. day, schal euerych tre; blede dropes of blood;
Þe vjte. day, schull castels & houses fall; all þat euer stood;
Þe vijte. day, stones schull fiȝtt; þe viij. þe erþe quake;
Þe ixe day, all hilles spreden abrod; & al þe werld euen make;
Þe x. day, men schul renne aboute; as þai wode were,
Line 13
As wilde bestes holes to seche; to hide hem inne for fere.
// Þe xj. day, bones of ded men; arisen schull & vpriȝt stonde;
Þe xij dai, as þeiȝ it steren weren; fram heuen to þe londe;
Line 16
Þe xiij. dai, vche quik þing schal dye; þe xiiij. fire aliȝt,
And brenne al þe middelerd; so crist it wil diȝt;
Þe xv. dai, schollen .iiij. Aungels comen; a .iiij. half mydlerde,
& blowen þorouȝ-out al þe werlde; þat vche man schal be aferd;
ffor in þilk age he schal arise; þat god was inne ded,
Line 21
Of litel more þan .xxxti. wyntren; as ich ȝou habbe ised,
¶ Lamentacio animarum. [[This is the Head line in the MS, tho' there is no break in the story.]]
[folio 71a] Wiþ þilk body þat he had here; he ne schal so litel misse
As þe lest her of his body; I sigge ȝou Iwisse.
Line 24
