Ȝif man fourmeth enes þe croyz : a-non þat i-ne mot þanne.
Þare-fore ich wot þat euerech man : wole nou þe soþe i-se
Þat þe croiz me hauez ouer-come : and al bi-leue me.
Line 96
Allas, alas þe time, i seiȝe : al ich worþe nouþe for-sake!
Iudas, Iudas, ȝwat was þe : hou hauest þou on i-take?
Þoruȝ A Iudas, þat was ȝwilene : Iesus to deþe ich brouȝte,
And nov þoruȝ Iudas ouer-come ich am : and i-brouȝt to nouȝte.
Line 100
Strencþe ne worth me neuereft non : bote ani man wolle with wille
Serui me to paye is flesch : is soule for-to spille;
Nouþe mi strencþe is me bi-nome : fondi ich mot with ginne
And with traisun, ȝif ich mai : ani man to me i-winne.
Line 104
I-ne may here no leng bi-leue : for þis me þinchez longue;
For þe creoiz þat me is so neiȝ : in pine ich am ful strongue."
IVdas seide: "go heonne anon : and ne cum [MS. ne cum he cum] here non-more!
I-founde is, þei it late beo : þat schal ouer-come al þi lore.
Line 108
He þat haueth here þis dede man : fram deþe i-brouȝt to liue,
Pulte þe and þi pouwer al : into helle grounde bliue."
Muche was þe Ioye of þe croyz : þat men maden þo þere;
With gret song and with processioun : to þe Quiene huy hire bere.
Þo nam Iudas cristindom : and þo he ibaptized was,
he liet him cleopien Quiriac : þat erore hiet Iudas.
Line 114
Þe Quiene of seluer and of gold : one riche schrine heo wrouȝte,
And deorewurthe ȝimstones : and þe Rode þare-inne [MS. innne] heo brouȝte.
Op-on þe hulle of caluarie : þare huy þe rode founde,
A noble churche heo dude a-rere : I-hered beo þulke stounde!
Line 118
Þo wilnede þe Quene muche : After þe nayles þreo
Ȝware-with ore louerd was : inailed to þe treo.
Line 120
Quiriac, þat hiet er Iudas : wende to þe place
Þare ase þe croiz i-founde was : and bad ore louerdes grace,
Þat he, ȝif is wille were : þe þre Nailes him sende.
Þe Nailes with liȝtingue gret : op of þe eorþe wenden.
Line 124
Quiriac þonkede Ihesu crist : and with gret Ioye heom nam,
And bi-tok heom heleyne, þe guode Quene : þo he to hire cam.
Þus was þe holie Rode i-founde : þe þridde day of May,
Þat we holdez in holi churche : þe holie rode-day.
Line 128
