Þare-fore, ȝif he eou axeth ouȝt : ȝe ne mowen eou nouȝt skere.
Line 72
Ake ȝif he him sewi [al. schewe] so : þat ȝe him mowe i-seo,
biddez him for his louerdes loue : þat he beo milde to me,
Þat he ne come nouȝt here neiȝ me : þat ich beo to grounde i-brouȝt
And i-tormented ase mi felawe is— : for i-nelle mis-don him nouȝt."
¶ Þo þis fole men þis i-heorden : huy weren in gret þouȝt,
Line 77
And longue heom þouȝte are huy hadden : seint Bartelmevȝ i-souȝt.
huy wende aȝen to heore owene temple : ake huy weren alle blinde :
twei daiȝes huy souȝten him faste : and ne miȝten him nouȝwere i-finde.
Line 80
A dai ase al þat folk : to þe temple was i-brouȝt,
for-to honouri heore false god : þat ne miȝte heom helpe nouȝt,
A guydi man þare cam al-so : þat þe deuel hadde i-beo longue
In him and bi-nomen him is wit : and i-tormented him ful strongue.
A-non so þis gidie man : in-to þis temple cam,
Þe deuel þat in him was : gret deol to him nam,
Line 86
wel loude he gradde, "seint Bartelmeuȝ : ich bi-seche þe,
Þine oresones brennez me al : þou haue merci of me!"
Line 88
¶ Þis holie man stod þare-bi-side : and answerede him a-non :
"beo doumb!" he seide, "ich þe rede : þat þou out of him gon."
Þe deuel fleuȝ a-non with þat word : out of him in þulke place, [folio 158b]
And þe sike man [al. om.] bi-cam hol and sound : a-non þoruȝ godes grace.
Line 92
Þat folk stod al in gret wonder : þo huy i-seiȝen þis cas,
And bi-heolden þene holie man : þat of swuch power was,
And tolden wide þis holie dede : þat ne miȝte nouȝt beo i-hud.
In þusse manere seint Barthelmevȝ : was formest in Inde i-kud.
Line 96
Pollimius hiet þe kyng : þat of þulke contreie was :
Sone þe tiþingues to him comen : of þat faire cas.
he hadde ane douȝter þat was lunatyke : þat þe deuel hadde muche with to done
And made hire witles [al. biwit] euerech monthþe : ase hit feol in þe stat of þe mone.
Line 100
he sente to þis holie man : seint Barthelmevȝ wel sone,
Þat he of is douȝter hadde reouþe : and hele hire þoruȝ is bone.
Þudere wende þis holie man : and þis mayde founde
Bitinde alle þat neiȝ hire come : and grenninde, faste i-bounde.
Line 104
