More Ioye ne miȝte beo i-seiȝe : bi none mannes liue,
Þane was, þo huy to-gadere comen : a-mong heom alle fiue.
Line 300
here we mouwen alle i-seo : ore swete louerdes miȝte,
Þat euere atþenende he wole ȝelde : þe manne þat him seruez with riȝte.—
HIt bi-ful þat þe Aumperour : ouer-al sende is sonde,
Line 303
Symon Magus, þe luþere man : to sechen him into al þe londe,
For-to sleen him, ho-so him miȝte I-finde : al for his luþer-hede.
And þo symon Magus i-heorde þar-of : he was in grete drede.
On feolonie he þouȝte for wrathþe : of þe breþren tweie,
Faust and Faustin, þat weren with him : and departed fram him beiȝe.
Line 308
bi hore fader he cam a day : ase þe deuel him gan lere,
And caste on him is owene fourme : ase þei it him-sulf were,
Þoruȝ is foul enchauntement— : ho-so þene olde manne i-seiȝe,
wenden þat symon magus it were. : þare was þe deuel to sleiȝe,
Line 312
For þe Ioye þat his sones hadden : of him þare in one stounde;
And for he scholde beon for him a-slawe : ȝif he miȝte beon i-founde.
For euere þe deuel, and alle his : of feolonie doth þenche;
Ake atþe laste huy worþeth bi-traid : with heore feolle wrenche.
Line 316
¶ Symon Magus wende a-wei [orig. aȝen] : þo al þis i-don was.
Þis guode [man] ȝeode forth to is children : he nuste nouȝt of þat cas :
he cam and wolde gret Ioye make : with heom and with is wiue.
huy spatten on him, euerechone : and heten him a-wei wel bliue,
For he was þe deueles lyme : huy nolden nouȝt with him dele,
Line 321
Ake bote he þe sonere fram heom ȝeode : him to wroþer hele.
" Alas," seide þis olde Man : "Mine leoue [overlined.] children þreo,
Ȝwi wolle ȝe ouwer fader þus pulte and bete? : nelle ȝe me nonmore i-seo?"
Line 324
"Nay," seiden þis breþren þreo : "þov nart ore fader nouȝt,
Þov art symon Magus, godes trichor. : to deþe þov worst i-brouȝt;
Ȝif þe Aumperores [men] þe mouwen finde : þat wide þe habbez i-souȝt,
Þov worst to-drawe ase þe deueles lime : for falshede þat þou hast i|wrouȝt."
Line 328
¶ "Louerd, merci," seide þis olde man : "ȝwodere may ich nouþe iwende,
