Þat to þe bischope Albert : seint Miȝhel cam a-niȝt
Bi-side þe Montaygne of Toumbe : ase it were in a sijȝt:
Opon þe hulle of Toumbe : ane churche he him liete [r. het] a-rere,
Riȝt swuch one ase ope þulke of gargan : and þat it bi-tyme were.
Line 112
þe bischop axede in ȝwuche stude : he scholde þe churche make.
"I-chulle þe," quath seint Miȝhel : "guode tokne þarof take:
Ane bole þov schalt þare finde : þat þeoues habbet þare i-hud,
Opon þe heiȝe hulle of toumbe : þat nis nouȝt ȝeot i-kud.
Line 116
þare ase þou finst þe bole I-hud : þov schalt mine churche a-rere."
þe bischop þat wel onder-stod : and bi-gan is churche þere,
And þare a-rerde hire faire I-nov : to þe helpe of mani a man,
In þe honour of seint Miȝhel : ase hul [r. þulke] of gargan.
Line 120
Opon heiȝe hulles þis churchene weren : boþe of seint Miȝhel—
heiȝ man me þinchez he wolde beo : for he louede hulles wel.
he dude wel, for he miȝte beo : at hom opon is owe
And sittinde a-boute him wide i-seo : and þe contreie bet i-knowe,
Line 124
And hom a-ȝein þe sonere fleo : ȝwane þat he liȝte lowe;
he ne þurte carie of non oþur weork : noþur to ripe ne mowe.
For he let opon eiþer hulle : areren a chapel,
Muche folk þat ȝeot on eorþe is : onder-stant þat wel,
Line 128
And ȝwane huy a-rereth anie churche : to massi Inne oþur rede godspel,
Opon an hul bi custome : huy makiez of seint Miȝhel,
Ase þe Mount of seint Miȝhel : and þe Mount a-gv al-so,
And also oþere in fale studes : ho-so nimez ȝeme þar-to.
Line 132
IN þe grete se of Occean : þe hul of Toumbe is,
þat geth a-bouten al þe world : In þat on ende, i-wis.
Al-a-boute þe hulle geth þe se. : and In þe feste-daie euere-mo
þe se. with-drauth [MS. hire w. hire] hire twies aday : þat ech man may druyȝe gon
Forto honouri þulke holie stude— : and in non oþur tyme it nis
Line 137
þat þe .se. ne geth al-a-boute : bote on þe feste-daie, i-wis.
¶ So bi-feol In one time : þat þe se hire with-drouȝ
In þe feste-daiȝe of þulke stude : and folk þare wende In I-novȝ:
Line 140
So þat a womman grete with childe : cam In atþen ende,
And nas nouȝt so swift ase oþere weren : a-ȝeinward forto wende:
þe .se. for-closede hire sone : and heo bi-lefte with-Inne;
heo floterede þare in luyte reste : and in wel feble wunne.
Line 144
