And riȝt ase he wolde is owene ȝwelp : with wilde bestes it wuste.
Line 72
¶ Sethþe þare comen cristine Men : and in sum power weren i-brouȝt :
þat holie bodi huy founden sone : for it nas i-hud riȝt nouȝt.
Ake for huy ne founden nouȝt þat heued : a-boute huy wenden wide
And souȝtten it longue, In manie studes : euerech in his side.
Line 76
huy ne miȝten it finde for no þyng. : so þat huy comen ane day
bi-sides þulke þicke þornes : þare ase þat heued lai.
huy nusten nouȝt þat it was þere. : þo bi-gan þat heued to grede,
Ase it a-mong þe þornes lay : and riȝt þeose wordes sede :
Line 80
¶ "Here, here, here," with swete voyz : ase þei he were a-liue.
þo þat folk i-heorde þat : þuder-ward huy wenden bliue :
þat heued huy founden in þulke stude : ase hit him-sulf sede.
Louerd, i-hered beo þi miȝte : þat þare was a fair dede!
Line 84
þat heued huy beren to þe bodi : and setten it euene þare-to,
And beren it forth with gret honovr : ase riȝt was forto do. [al. 4 vv. more.]
TO seint Eadmundesburie huy ladden him : ase men cleopiez nouþe þene toun—
þare is on Abbeie of blake Monkes : ase huy setten him a-doun.
Line 88
In swyþe noble schrine huy brouȝten him : ase riȝt was for-to do.
þare he lijth ȝeot hol and sound : ase heo i-seoth þat comieth him to :
For is bodi þat was so to-drawe : hol bi-cam a-non
And sound, as þe ȝwyle he a-liue was : boþe of flesch and bon;
Line 92
¶ þat heued al-so faste to þe bodi : ase it was euerer.
In al is bodi nas o weom : þat man miȝte i-seo þer,
bote ase is heued was of I-smyte : ase ore louerd it wolde,
A smal red line is al-a-boute : schininde ase of golde.
Line 96
A swyþe fair pilegrimage it is : þudere forto fare,
For-to honouri þat holie bodi : þat þare hath i-leie so ȝare.
Novþe god for þe loue of seint Eadmund : þat was so noble king,
graunte us þe Ioye þat he is Inne : aftur ovre ending. Amen.
Line 100
45 [Miȝhel]. [This legend I have published before in 'Lemcke, Jahrbuch für rom. und engl. phil., 1874.']
SEynt MIȝhel þe Archaungel : and is felawes also,
huy beoth bi-tweone ore louerd and us : to schewi ȝwat we schulle do.
