And eyþer bad oþures blessingue : and noþur nolde it do.
Line 172
Ase heo leien longue to-gadere : bi-twene heom oþur word huy ne sede
bote "blesse þu me," "ake blesse þou me"— : þe Monek swatte for drede.
Þo seide þis womman, "i-blessed be god : þat bringueth þe soule bote."
Line 175
"Ȝe," seide þe Monek, "god us graunti : þat we þarof parti mote."
Þis womman, þo heo weren a-rise : to þe Moneke sone heo sede :
"Frere Zosyme, ho gan þe hidere : to a swuch wrechche lede?
hou is þe stat of holi churche : i-loked, and cristine-dom,
Line 179
And hou is it of þe heþene prince : þat heore riȝtes heom bi-nam?"
"LEoue Moder," þis Monek sede : "þe betere is in eche stude
holi churche and cristine-dom : i-loked for þine bede.
bide for me for godes loue : nouþe ich bi-seche þe!"
Line 183
Þis womman seide, "for þou art preost : þou schalt bidde for me.
Ake þat ich onbouȝsum ne beo i-seie : þei ich sunful beo,
I-chulle bidde for þe, mi leoue fader : þat þou schalt i-seo."
Þis womman tornede hire estward : and a-knes heo sat a-doun,
hire eiȝene and hire hondene opward heo heold : and seide hire oresoun.
Line 188
A-non so heo bi-gan hire oresun : wonder men miȝten i-seo :
Fram þe eorþe heo was op i-houe : þe heiȝþe of fet þreo;
Þare heo houede stilleliche : as þei heo were with-oute breþe,
heo ne wawede leome non : bote hire lippene vnneþe
Line 192
Ȝware-with heo seide hire oresun— : and no-þing hire op ne bar
bote ore swete louerdes grace— : fair Miracle was þar! [folio 120]
Þis Monek stod and bi-þouȝte him : gret wonder he hadde and fere :
he ne heold hire no womman : ake treouwede þat hit sum gost were,
For heo houede so a-boue. : ake after hire oresun
Line 197
Þis holi þing wel stilleliche : to þe eorþe aliȝte a-doun;
"Leoue fader," heo seide, "ȝwat is þe? : ȝwy chaungest þou þi þouȝt?
Ich am a womman of sunful flesch : a gost nam ich nouȝt."
Line 200
"Moder, þin ore!" þe Monek seide : and feol a-doun a-kne,
"to schewi ore swete louerdes miȝte : þi lijf tel þou me!"
Þis guode womman nam him up : "leoue fader," heo sede, [MS. seide]
"Schame it is to heore telle : of mine sunful dede.
Line 204
