[folio 117b] gret fuyr he dude him makien and guod : þat he were of chele i-brouȝt,
And leide [him] þare-bi wel softe— : ake al it was for nouȝt.
Ake þo he ne miȝte with fuyre him hete : ne with none oþur ginne,
his owene bed he let faire spreden : and brouȝte him þare-Inne;
cloþes i-nowe opon him he spradde : and helede [MS. holede (corr.?)] him wel faste.
Ȝeot he þouȝte ful sore of cale : for al þat he on him caste.
Line 128
Swyþe sori was þis guode man : and sore him a-gaste,
Þo he him dude al þat he miȝte : and þe chele so longe i-laste.
he stod and bi-heold þis selie man : a Musel ase he wende :
Sone so ore louerd it wolde : is hevȝ bi-gan a-mende,
Line 132
Atþe laste he werth so fair a man : ase euere any miȝte beo,
And so cler he bi-cam sone : þat vnneþes men miȝten him seo.
"Iulian," he seide, "god it þe ȝelde : þat þou me hast i-do!
In ore louerdes erinde of heuene : i-come ich am þe to :
Line 136
Ore louerd þe sente word bi me : þat þou art clanliche i-schriue
And þine penaunce hast wel i-do : and þine sunnes beoth for-ȝiue;
Swyþe wel þou him hast i-paid : þou and þi wijf al-so,
And boþe ȝe schullen with alle Ioye : newene come him to."
Line 140
Þo he hadde þis word i-seid : he nuste ȝware he bi-cam.
Þis guode man seint Iulian : to godes seruise him nam
And to his bi-hofþe him makede al-ȝare : he and is wijf al-so.
Sone after-ward in his seruise : heo deiden boþe-to
Line 144
And wenden to þe blisse of heuene : þare heo schullen euere beo.
guod it is to hereborewi Miseise men : bi heom þat men mowen i-seo,
For þare-with þis holie man : his sunnes bette inouȝ,
And a gret haluwe in heouene he is : þei he fader and moder a-slouȝ.
bidde we ȝeorne sein Iulian : þat he ore erinde beode
Line 149
Þat ore louerd us ȝiue milce and ore : and alle þat habbez neode,
Þat ȝwanne we oþur any cristine man : ouer lond schullen wende,
For is fader soule and is moder : þat he guod hereborewe us sende,
And atþe laste þoruȝ godes wille : þat we moten teo
Into þe blisse of heuene : and þare with-outen ende beo.
Line 154
39 Vita sancte Marie Egiptiace.
SEinte Marie egyptiane : In egypte was i-bore;
Al hire ȝounge lijf heo liuede : in sunne and in hore.
