Þis holie man nam op is staf : smot doun in-to þe grounde [folio 116]
Line 24
And piȝte þane poynt a luyte in þe eorþe. : þare cam walle out a-non
Þet beste water þat miȝte beo : a-mong heom euerech-on,
And fond heom alle drinke i-nouȝ : þare neuer er welle nas,
Þoruȝ vertue of þis holie man— : fair miracle þare was!
Line 28
So mani fair Miracle ore louerd dude : for loue of seint Iulian,
Þat muche del of þat folk : heolden him a god a[nd] no man.
In godes seruise ate laste : his lijf he brouȝte to ende
And a luyte bi-fore candel-masse : to heouene he gan i-wende,
Line 32
In þe latere ende of Ieneuer : þis confessour so hende.
Nou god for is swete loue : us þudere alle sende.—
An oþur seint Iulian þare is : þat men biddeth wel faste
After guod .In. in onecouth stude : ȝwane heo beoth sore a-gaste.
Line 36
Vita sancti Iuliani boni hospitis.
SEint Iulian þe guode herebeger : of noble kuynde com;
stalewarde and strong man he was : and louede wel cristin|dom;
he louede al-so game i-nouȝ : of hauekes and of houndes—
A noblere bodi þane he was : nouȝwere nas non i-founde.
Line 4
Ase he hountede In a dai : In Iolifte j-nouȝ,
A swyþe fair heort he i-saiȝ : and þare-after faste he drouȝ.
he strencþede him to nime þat best : and siwede after faste.
Þo þis heort hadde longe I-orne : he bi-turnde him ate laste,
Line 8
And spak with him, ase god it wolde : "Iulian, Iulian," he sede,
"Ȝwi siweste me so faste?" he seide : "þou schalt don anoþur dede :
boþe þi fader and þi moder : þou schalt ȝeot a-quelle.
Ake ne beo þou no-þe wroþure with me : þei ich it þe telle."
Line 12
Þo þis guode man þis i-heorde : him bi-gan wondri, and drede,
For þat wilde best so spack : and for wordes þat he sede;
him wondrede, ase him miȝte wel : for it spak a-ȝein kuynde,
he was a-ferd for þat [superscribed.] he him bi-het : and ofte it hadde in muynde,
Þat he scholde fader and moder sle. : And to fleo þat dede,
he wende out of contreie stilledliche : ase god him wolde lede.
Line 18
Into feorrene contreie he wende. : so þat he cam bi cas
