Seint powel to cristinedom : cam In þusse manere.
god us graunti for is loue : In heuene to ben is fere.
32 Vita sancte Brigide virginis.
Seinte Bride of heiȝe men : In scotlond heo cam,
Of riche men and of gret power : In lawe of cristindom.
Þis Maide bi-gan wel ȝong : to beo of porture hende;
Þare ne scholde vil dede ne word : neuere fram hire wende.
Line 4
heo bigan ore louerd crist to serui : in worde and in dede;
Ȝwane hire ȝongue felawes weren atþe pleiȝ : hire oresones heo seide. [folio 94]
¶ hire moder louede hire swiþe wel : þat, þo heo was of elde,
Al hire chese and al hire milk : heo bi-tok hire to welde,
Line 8
And al þet ȝwijt þat In þe court was : heo scholde ope hire helde,
At a certeyn dai þarof : trewe a-countes ȝelde.
Þat Maide let gaderi swiþe clene : þe Milk ant þe chese,
botere and al þat þarof cam : nolde heo nowiȝt leose :
Line 12
Ȝwane heo seiȝe anie pouere Men : heo delde it heom wel clene—
hire deierie was euere of chese and botere : bar and swiþe lene.
Ȝwan hire daiȝ was neiȝ i-come : a-countes forto ȝelde,
Of hire moder heo was a-ferd : glad heo was ful selde.
Line 16
Ȝeorne heo bad ore louerd crist : þat he scholde beo hire red,
he nadde ȝwarof a-countes ȝelde : ase hire moder hadde i-seid.
Þo þe day was i-come : heo nuste ȝware-with hire a-quite,
For þare nas in þe deierie : nouȝt adel of none ȝwite.
Line 20
Naþeles þe moder eode þudere : to loke hou it ferde :
heo fond ech lome i-heped ful : al a-boue þe brerde,
Of chese and of botere : and of oþur ȝwijte also.
he ne may neuere is ȝwyle leose : þat for þe guode wole ouȝt do.
Line 24
hit bi-feol þat þis Maydenes frend : nomen heom to rede
Þat heo i-weddet scholde beo. : and heo anon-riȝt heom with-seide.
to þe bischope heo wende a-non : and a-vouwede chastete,
And seide heo nolde neuere man habbe : þe sikerore for-to beo.
Line 28
For Ioye þat þe bischop hadde of hire : he seide þa[t] he wolde ete,
And alle is Men, a dai with hire : he bad hire maken heore mete.
Þarof was þis Maide glad : and naþeles sore heo hire dradde,
For bote bred and Ale and one kou : non more mete heo nadde.
Line 32
