The early South-English legendary ; or, Lives of saints. I. Ms. Laud, 108, in the Bodleian library. Edited by Carl Horstmann.
Horstmann, Carl, b. 1851.

51 Vita sancti Cuthberti.

SEint Cudbert was i-bore : here in Engelonde.
god dude for him gret miracle : ase ȝe schulle under-stonde.
Þe ȝwyle þat he was a ȝong child : and in is eiȝteteoþe ȝere,
With ȝounge children he pleide atþe bal : þat is felawes were.
     4
Þare cam gon a luyte child : hit ne þouȝte þreo ȝer old,
A swete creature and fair : milde it was and bold;
to þe ȝonge Cudbert he ȝeode : "leue broþer," he sede,
"Ne þench nouȝt on swuche idele games : þanne dost þou a guod dede."
     8
Seint Cudbert ne tok none ȝeme : to þe childes rede,
And pleide forth with his felawes : ase huy alle him bede.
Þo þis ȝongue child i-saiȝ : þat he is red for-sok,
A-doun he feol to grounde : and gret deol to him tok,
     12
And bi-gan to weopen sore : and his hondene forto wringue.
Þe children hadden alle deol of him : and bi-lefden heore pleiingue,
huy gladeden him ase huy couþen : sore huy gonne to siche;
And euere made þis ȝoungue child : reulich deol i-liche.
     16
"A weilawei," þis Cudbert seide : "ȝwi weopest þou so sore?
Ȝif we þe habbez ouȝt mis-don : we ne schullen none more."
Þanne spac þis ȝounge child— : for sore huy weopen beiȝe,
"Cuthbert," he seide, "it ne falleth þe nouȝt : with ȝongue children to pleiȝe;
     20
None swuche idele games : ne bi-cometh þe for-to wurche,
Ȝwane god hath i-porueid þe : on heued of holie churche." Page  360
With þusse worde men nusten : ȝwodere þat ȝongue child i-wende—
An Aungel of heouene it was : þat ore louerd þudere sende.
     24
Þo bi-gan*. [MS. bigan gan] seint Cudbert : to weope and siche sore,
And lette a-wei is idele games : þo nolde he pleiȝe more:
he made his fader and is freond : setten him to lore, [folio 155]
And in his ȝonghede nyȝt and day : of-seruede cristes ore.
     28
Þo he in grettore eolde was : ase þe bok us hauez i-seid,
hit bi-feol þat þe bischop seint Aydan : sone þare-Aftur was ded.
Cudbert a-felde was with schep : Aungles of heouene he i-seiȝ
Þe bischopes soule seint Aydan : to heouene bere an heiȝ.
     32
"I-nelle schep wite," seint Cudbert seide : "fol ich am to longue,
Schep i-nelle wite none lengore nouþe— : a-fongue ho-so heom*. [al. om.] a|fongue."
he wende to þe Abbeye of Gireuaus : greiȝ monek he bi-cam—
gret Ioye mauden þe Monekes alle : þo he þe Abite nam.
     36
Swiþe wel he is ordre heold : he was of grete penaunce,
Þe holieste monek he was i-holde : in engelonde oþur in Fraunce.—
hit bi-feol þare-aftur-ward : þat þare cam a goute
In is kneo, of Anguische gret : ȝware-of he hadde doute;
     40
So longue, þat is kneo to-swal : gret Anguysche he i-fielde,
Þe senewes in is hamme schronken : he ne miȝte þanne leg i-wielde,
Ne strechche forth is leg bi-neoþe : þat Ioynede to is þiȝ;
Ase a crupel lame he was—: he i-werth swiþe sori.
     44
No man ne couþe him þare-of rede : þat is leg i-seiȝ;
Ake nathþeles euere was is hope : to iesu crist a-heiȝ.
In A day, solas for-to habbe : he liet him bere a-boute,
And in þe fielde he i-mette a wel fair knyȝt : with loreins swiþe proute.
     48
Þe knyt bad heom one stounde a-bide : þat seint Cudbert bere;
he bi-heold and handlede þane sore leg : ase þei he leche were.
"Nim," he seide, "þe milk of one kov : þat is of o colour,
Iuys of smal-Ache do þar-to : and clene ȝwetene flour;
     52
Seoth it to-gadere swiþe wel : and leie it al hot þar-to,
A-brod ase þei hit a plastre were : and guod it schal þe do."
Þo he hadde þis i-seid : þe knyȝt is wei forth wende—
An Aungel of heouene it was : þat ore louerd þudere sende. Page  361
     56
Are seint Cudbert þe plastre hadde : longue, him þouȝte,*. [om. him þouȝte] to is legge i-bounde,
his leg and is senewes : bi-comen hole and sounde.—
hit nas nouȝt longue þare-aftur-ward : ase þe bok us doth telle,
Þat þe Abbot sende him out : to one of heore celles;
     60
hostiler he was þare i-mad : gistes to onder-fongue.
god dude fair miracle for him : are he hadde i-beo þare ouȝt longue.
Aungles þare comen to him ofte : and with him huy ete
Ase þei it oþure gistes weren— : þe gistningue was ful swete!
     64
gistes wel gladliche þene mete he ȝaf : he nolde no man werne,
heom þat beden par charite : for he nas noþing stuyrne.
him-seolf he wolde ȝiue heom watur : to waschen with hire*. [r. here] hond,
And serui heom of alle þe mes : and bi-fore heom stonde.—
     68
hit bi-feol þat an hiendi gist : and a wel fair þare cam
And bad þe mete par charite : and Cudbert In him nam;
watur to is hondene he him ȝaf*. [al. largeliche] : and*. [om.] on þe heiȝe deis him sette,
Mete and drinke he him ȝaf : and with guod heorte it fette, [folio 155b]
     72
to þe bachouse he ȝeode him-seolf : ase þe bakares hadden i-bake,
hi[s] giste to fetten bred al hot : þe gladdore him for-to make.
Þo he cam a-ȝein with þe hote bred : his gist ne fond he nouȝt;
Þare-of hadde þis holie man : gret wonder in is þouȝt.
Þicke snovȝ was þare-oute : he ne miȝte nouȝt finde is fore,
     76
ȝware-forth he wende a-wei : in snowe ne in þe flore.
Ase he souȝte þeosne holie man : a[n] wende a-boute wel wide,
he smulde a suyþe swote smul : in a chaumbre þare-bi-side.
     80
Þo he into þe caumbre cam : he fond a bord i-sprad,
And þreo loues þare-op-on al hote. : þo was he wel glad,
And seide, "þis was godes Aungel : þat hath þis hidere i-brouȝt;
he cam hidere us for-to fede : and him-seolf ne beo i-fed nouȝt."—
     84
eche niȝte ȝwane þeos monekes : to bedde weren i-gone,
Cudbert wel stilleliche : wende him forth al one,
In-to þe colde se he ȝeode : a-non op to þe chinne;
For-to hit was midniȝt neiȝ : so he stod þare-inne.
     88
Þanne he wende up þare-of : and þo*. [al. whan] he cam to londe,
For feblesse he lai a-doun : he ne miȝte nouȝt wel stonde.
Þanne comen þare op of þe se : tweie oteres wel grete; Page  362
Ouer-al huy lickeden þis holie man : are huy him wolden lete.
     92
Ȝwane huy him hadden i-lickede so : huy wenden in-to þe se,
And seint Cudbert hol and sound : in-to is celle a-ȝe;
with oþure he ȝeode to matynes : ȝeorne he song and radde,
Þe Monekes wenden euer-echone : þat he come fram is bedde.
     96
A monek þat þare-inne was : onder-ȝat it ech del,
Ake ase seint Cudbert him bad : he*. [MS. þat he] it for-hele[de]*. [MS. for hele] swiþe wel.—
Ase ore louerdes wille was : þare-aftur it dude bi-falle
Þat þe bischop of Duyrham deide : al-so we schullen alle:
     100
Men nomen þo seint Cudbert : and maden him bischop þere.
Swyþe wel he wuste is bischopriche : þat folk he dude wel lere.
þo was þat soþe to ende i-brouȝt : þat þe Aungel him seide,
Þat he scholde an heued of holi churche beo : þo he atþe bal pleide.
þo he hadde god i-serued longue : aftur him he sende:
     105
In þe Monþe of luyde : of þis worlde he wende
to þe Ioye of heouene. : and god us graunti al-so,
Þoruȝ þe bone of seint cudbert : þat we moten comen þar-to.
     108