The early South-English legendary ; or, Lives of saints. I. Ms. Laud, 108, in the Bodleian library. Edited by Carl Horstmann.
Horstmann, Carl, b. 1851.

46

ÞE riȝte put of helle is : a-midde þe eorþe with-Inne,
þat ore louerd it made i-wis : þat quoynte was of ginne.
     392
heouene and eorþe he made furst : and seothe alle þing þat is.
þe Eorþe nis bote a luytel hurst : a-ȝein þe riȝte heouene, i-wis.
Heouene geth al-a-boute þe eorþe : euene it mot weyȝe;
A-midde riȝt heouene þe eorþe is : ase þe streon a-midde þe Eyȝe.
     396
Muche is þat on þanne more þane þat oþur : for þe leste steorre is
In heouene, ase þe bok us tellez : [more] þane al þe eorþe, i-wis.
For ho-so were an heiȝ bi ane steorre : ȝif it so miȝte beo,
So luyte wolde þe eorþe þinche : þat vnneþe he scholde it ouȝt i-seo.
þe heouene geth ene a-boute : þoruȝ daiȝe and þoruȝ nyȝt;
     401
þe Mone and þe steorrene with him heo berth : and þe sonne þat is so briȝt:
For þat is euene a-boue þin heued : riȝt atþe nones stounde,
Ounder þine fet euene it is : at midniȝt onder þe grounde,
     404
And cometh up ȝwane þe sonne a-rist : and [o]uer þe is at none;
heo makez euene þus hire cours : and comez a-boute wel sone.
Ase an Appel þe eorþe is round : so þat euere-mo
half þe eorþe þe sonne bi-schineth : hov-so it euere go,
     408
And Noon it is bi-nethen us : ȝwane it is here mid-niȝt;
Ase man may þe soþe i-seo : ho-so hauez guod In-siȝt:
Ase ȝif þov heolde ane clere candele : bi-side an Appel riȝt,
Euene half þe Appel : heo wolde ȝiuen hire lijȝt.
     412
*. [firmamenta.]EIȝte firmamenz þare beoth : swuche ase we i-seoth.
þe Ouemeste is þe riȝtte heouene : in ȝwan þe steorrene beoth—
for godes riche is þare a-boue : þat last with-outen ende;
þarto we beoth i-maked— : god leue us þudere i-wende.
     416
¶ þare-bi-neoþe beoth seoue firmamenz : þat euerech of heom, i-wis,
*. [planete.]One steorre hath with-oute mo : þat planete i-cleoped is. [folio 137]
Ichulle nemmen heore seoue names : and formest bi-guynne hext:
Saturnus is al a-boue : and Iupiter sethþe next,
     420
þanne Mars bi-neoþen him : and sethþe þe sonne is,
Venus sethþe, þe clere steorre : Mercurius þanne, i-wis, Page  312
þat wel selden is of us i-seiȝe : þe Mone is next þe grounde.
þoruȝ gret wit of clergie : heore names weren furst bi-founde:
     424
for euerech of þeos seouene mouwen : gret wonder on eorþe do,
boþe of wederes and of fruyt : ase heore power ȝif þare-to.
And al-so man,*. [r. men þat beoth] ȝwane he is i-bore : onder heore power, i-wis,
Schullen habbe diuers lijf : euere ase heore vertue is :
     428
Some lechours, some glotones : and some of oþur manere.
And natheles a man of guod Inwit : of alle he may him skere :
for þe planetes ne doth non oþur : bote ȝiuez in mannes wille,
To beon luþur oþur guod : ase heore uertue wole to tille,
     432
And ȝiuen*. [r. ȝiuez] him al-so qualite : to don so and so;
Ake nouȝt-for-þan after is inwit : ech wys man may do :
for swuch qualite no man ne hath : to beon lechor oþur schrewe,
þat he þare-with ne may him wite— : ake natheles so doth fewe.
     436
Of þe seoue planetes al-so guod : heore power ȝe i-seoth,
for þe seoue Dawes in þe wyke : þare-aftur I-nemde beoth :
Of Saturnus so is satur-day : and sonen-day of þe sonne,
And of þe Mone Monen-day : ȝif ȝe wel rikeni konne;
     440
Of one planete euerech day : In þe wike i-cleoped is,
On englisch oþur latyn : bote ȝe telle a-mis.
And for mars and saturnus : In heore power luþere beoth
And luyte guod on eorþe doth : ase þis clerkes i-seoth,
     444
þare-fore Men schoniez muche : þene satur-day bi-guynne,
And þene tywesday, euerech [werc]*. [om.] : to guode ende it forto wynne.
Among alle þe planetes : þe sonne a-midde heom is
Ase is þe kyng a-Midde is men : to conseili heom i-wis :
     448
Al-so þe sonne, þat heo mouwe : schyne a-boute eche-on :
for alle habbez lijȝt of hire : and with-oute hire nouȝt on.
Ase man may bi þe Mone i-seo : þe ȝwyle heo is neowe riȝt :
A luyte rondel ase a sikel : Men seoth þar-on liȝt,
     452
And al þat oþur del with-Inne : swiþe blak as a rauon*. [as a r. on the margin.] it is.
Riȝt so blac is al þe mone : of hire-sulf, i-wis,
Bote þare ase þe sonne schynez : þat hire liȝt ȝif hire al
And Makez hire schyne a-boute : briȝtore þane ani cristal.
     456
for ȝwanne þe sonne schynez on cristal : oþur in watere cler,
A gret leome it ȝif out a-ȝein : and schynez feor and ner : Page  313
Al-so fareth þe Mone, i-wis : þe sonne schynez doun riȝt
Euene on hire and heo aȝein : and a-mong us sent hire liȝt.
     460
And for þe sonne is feor a-boue : riȝt at-fore þe prime,
bi-neoþen hire þe Mone is euene : and þe sonne schyne[z] bi-tyme
Al In þe ouere side of þe Mone : and hider-ward nowiȝt : [folio 137b]
þanne ne seo we nouȝt of hire : ne heo ne ȝifth no liȝt.
     464
So þat þe sonne bi-fore geth : luyte and luyte, i-wis,
And schyneth on þe hiderore half : on þulke þat ner him is:
Heo makez þe Mone wexe so : luyte and luyte bi stounde,
So þat þe Mone is heiȝful : ȝwane þe sonne geth to grounde.
     468
þe Mone bi-gynnez bi este a-rise : euene a-ȝen hire riȝt*. [riȝt on the margin.],
þat in þulke half to-ward us : þe sonne sent hire lijȝt :
þanne is þe ouere half deork : and þe hiderore half al briȝt
And sent hire leome hidere to us : and schinez al þe niȝt.
     472
So þat heo drauth hire*. [on the margin.] feor þe sonne : and luyte and luyte is blak,*. [al. a-bac]
And euere is cler toward þe sonne : and þat oþur del is blak;
And ate laste toward us is al blac : atþe monþes ende
And cler a-boue ase is þe sonne : þat to hire liȝt deth sende.
     476
So þat þe sonne in þe haluendele : schinez euere-mo,
Ȝwat a-boue and ȝwat bi-neoþe : hov-so hit euere go—
Ase man may i-seo bi ane candele : þat is bi-side ane balle,
þat ȝifth liȝt on þat haluendel : hov-so it euere falle.
     480
And ȝwane þe sonne is onder þe eorþe : and þe Mone a-boue a-nyȝt,
bi-side þe eorþe in þat on half : ȝeot þe sonne sent hire liȝt.—
¶ An hundret siþe and fiue and sixti : ase it is i-write,
þe sonne is more þane þe eorþe : ho-so it wole i-wite;
     484
And þe eorþe is more þane þe Mone : nye siþe, i-wis.
þe Mone þinchez wel þe more : for heo so neiȝ us is.
þe sonne is herre þane þe Mone : More þane schwche þreo
þane it beo heonnes to þe Mone— : þe lasse heo is to seo.
     488
Muche is bi-twene heouene and eorþe : for þe man þat miȝte go
euereche daye fourty mile : and ȝeot sumdel mo,
He ne scholde nouȝt to þe hexte heouene : þat ȝe alday i-seoth,
comen in eiȝte þousende ȝer : þere ase þe steorrene beoth;
     492
And þei adam, ore furste fader : hadde bi-gonne a-non
þo þat he was furst i-mad : and toward þe heouene i-gon Page  314
And hadde eche daie fourti mile : euene opriȝt i-go,
     495
he ne hadde nouȝt ȝeot to heuene i-come : bi a þousende mile and mo.
Sikere ȝe beon isegge ȝeov soth : I-leue ho-so i-leue—
hov schulle we þat comiez so late : after Adam and eue?
Ake ȝwane a man is on eorþe ded : and is soule beo guod,
heo nath with hire non heuinesse : of flesche*. [MS. of flechs of flesche] ne of blod :
     500
Ȝif heo is þanne with-oute sunne : heo hath Aungles cuynde
And mai beo nouþe here and þer : ase quik ase mannes muynde.
for ase ȝe I-seoth þe liȝtingue : out of þe cloudene i-wende
     503
þat comieth of þat on half of þe world : and al-so sone in þe oþur ende,
wel smart-loker scheot ane mannes soule : ȝe more þane swuche seuene,
Ȝif heo is oute of sunne : þene riȝte wei into heouene.
Ake wel sonere he may to helle come— : þare-fore it is i-sene
þat wel mo to helle wendez : ȝe ich drede swuche tene.
     508
*. [Elementa.]BI-neoþe þe loweste heuene : þat þe mone is on i-brouȝt, [folio 138]
so beoth þe foure Elemenz : of ȝwan we beoth i-wrouȝt.
Next þe Mone þat fuyr is hext— : ech-one huy beoth rounde—
þe eir is þanne next bi-neothe : and tillez riȝt to þe grounde,
     512
Sethþe is watur, and sethþe þe eorþe— : þeos beoth foure, i-wis;
of ȝwan man and eche quic þing : for-soþe I-maked is.
Ore louerd in ech-on of þis foure : al dai scheweth is miȝte,
Ase ȝe mowe in þe stude of fuyre : I-seo a wonder siȝte,
     516
Scheote as þei it a steorre were : bi þe lofte an heiȝ,
Ake þe steorrene beoth feorre a-boue : for þat is sumdel neiȝ.
þe sonne may here a-mong us : gret strencþe and miȝte do :
heo drauth up þe kuynde of þe watere : and of þe eorþe al-so,
     520
he drauȝth up of*. [MS. op] þe eorþe in druye wedere : ase it were a druye breth,
So þat þoruȝ hete of þe sonne : a-boue*. [MS. aboute] þe eir it geth,
And ȝwane it comez a-mong þe fuyre : sone it bi-gynnez forto tiende
And al berninde it scheot forth : þat hit beo i-bar[n]d to ende.
     524
þare-fore men ne i-seoth no swuch þing : bote it beo in hete.
*. [Fuigur.]¶ Liȝtingue comez al-so þare-of : ȝwane it comez to wete :
for al þat ilke druye breth : þat is so i-drawe an heiȝ
þoruȝ hete þat was bi-fore : and a cloude þat*. [al. om.] þare was*. [al. is] neiȝ,
     528
A-non so it is a-fuyre : it scheot þoruȝ þe cloude,
And þe ȝwile it is in þe watere : it goþeleth swyþe loude. Page  315
Ase ȝif a man nome ane sclabbe of Ire : þat glowynde were a-fuyre
And pulte in watere, it wolde goþeli loude : þat men miȝten it feor i-huyre.*. [Tonitruum.]
     532
Al-so þat fuyr up an heiȝ : þat bi þe cloude is i-tend;
hit goþelez in þe watere loude : as it þoruȝ-out I-went—
And þat is þe þondre, i-wis : and siker non oþur þing;
And ȝwane þat fuyr scheot þoruȝ-out : þat is þe liȝting,
     536
And þat scheot a-brod þoru al þe world— : þat comez aftur þe dunte;
And natheles it þinchez bi-fore : for it ne may nouȝwere at-stunte.
Ȝif here were an heiȝ stepel : and a man a-boue sete
     539
And men i-seiȝen him smiten al an heiȝ : guode duntes and grete,
þou miȝtest him seo wel longue smite : þe duntes with þine eiȝe
Are þov scholdest þene dunt i-heore : ȝif he were ouȝt heiȝe—
for man mai i-seo wel feor a þing : a-non so it is ido,
     543
Ȝif þare nis no-þing bi-tweone : ake man ne may nouȝt i-heore so.
Ȝwane þat fuyr comez into þe ȝwater : gret noyse a-non þare is,
Ake men ne heorez it nouȝt a-non : for it is so feor, i-wis;
     546
¶ þe liȝtingue we i-seoth a-non : ȝwane it is þoruȝ i-brouȝt—
þare-fore men þinchez it comez bi-fore : bote natheles it ne doth nouȝt :
for ȝwane þe liȝtingue is i-come : A-non we habbez þe siȝte,
Ake þet sovn ne may nouȝt : so sone a-doun to us a-liȝte.—
Novþe nis þe druyȝe breth of eorþe : neuere with-oute hete
Idrawe up, þat comez bi-fore : ne a-queint with-oute wete :
     552
þare-fore bote after hete : man ne schal no þondre i-seo,
And þat þe weder smite in wete : for non-oþur ne mai it beo.
So þat man schal in puyr somer : selde þondre i-huyre : [folio 138b]
For þer is þanne selde wete : to maken quenchingue of fuyre;
     556
Ne in puyr winter no-þe-mo : for þanne nis non hete
To drawe up þe drouȝþe of þe eorþe : for þe muchele wete.
þare-fore Men seggez þat wynter-þondre : selde man schal guod i-seo,
For he ne may neuere come : bote þat weder onkuynde beo.
     560
Ake bi-tweone somer and wynter : ase in Aueril and may,
And eft-sone fram heruest : forto seint Clementes day,
þanne is þe þondre kuynde Inov : and liȝtingue al-so :
For þanne is þat weder wet : and ofte hot þar-to.—
     564
Ȝe mouwen axi, ȝwane it*. [al. om.] þundre is : I-meingt of fuyr in wete, Page  316
hov is þat hit a-quellez men : ofte bi weye and strete,
And smit a-doun wel grete treon : and deth wel mani a wonder?
þare-fore ich mot eov more telle : of kuynde of þe þonder.
     568
ÞO ore louerd þolede on eorþe deth : and bond þene deuel for man
A[n]d debruysde helle-ȝates : with þondre þudere he cam.
þare-fore euereft Aftur-ward : ȝware-so þe deouelene beo,
     571
Of þondre huy beoth so sore a-ferd : þat huy nutez ȝwodere to fleo;
And huy þat woniez in þe lufte : and oþure ase wel so heo,
In strongue fere comieth a-doun : and nutez ȝwodere teo,
And huy slez men bi þe weie : ase man may ofte I-seo—
þat muche fere god heom ȝyue : and no-þe worse us ne beo!
     576
In oþur manere þare comez ȝeot harm : of þe þondre a-mong :
For þare ase þat weder is : þe tempeste is ful strong,
Of wynd, . of watur,. and of fuyr : þat þei þare were*. [MS. weren] þere
A Mulleston, he scholde al-to-driue : þei he of molten bras were.
     580
Ȝwane þe tempeste is þare so strong : me þinchez, it nis no wonder
þei þare come leome ofte a-doun : with þe dunte of þe þonder;
Ȝwane þe wynd and þat fuyr smiteth : þoruȝ þe watur-cloude,
     583
with swyþe grete strencþe it liȝt a-doun : ase man mai i-huyre loude,
And smit ase it were a dunt : oþur blast of grete miȝte—
No wonder þei it smite harde : ȝwane it so deth a-liȝte—
And brekez treon and quellez men : and deth gret oþur wonder.
In þis manere comez þe harm : þat men i-seoth of þe þonder.
     588
Men I-seoth ofte liȝtingue : brenne hous and schrenche,
þat vnneþe mai ani watur : þat fuyr þarof a-queenche;—
For of þe watur-cloude a-boue : þat fuyr is out i-brouȝt
     591
And for it out of þe watere comez : þat fuyr nele quenche nouȝt.—
Nouþe mouwe ȝe Axi in ȝwuche manere : ȝwater comez so heiȝe,
And ȝwarof comez rein and snovȝ : þat ȝe i-seoth with eiȝe.
¶ þe sonne, þat is al maister here : sent a-doun hire hete
And makez þe wateres breþi up-riȝt : as þei huy scholden swete,
     596
Boþe þe .sees. an ferchse wateres : and drauȝth op so þane breth,
So þat a-boue in þe lufte : þilke mist euene geth.
Novþe is þare uppe in þe lufte : a swyþe cold stude, i-wis,
For bi-tweone heoue and eorþe : so cold non þare nis, [folio 139]
     600
þare ase þe blake cloudene beoth : and oþur wederes al-so— Page  317
hit nis up-riȝt fram þe eorþe : bote Ane mile oþur two.
*. [Plunia.]Ȝwane þe sonne hath þudere i-drawe : þene mist for hete,
It ne may no feor for þe colde : ake bi-cometh al to wete,
     604
And gaderez þare to one watur-cloude : and houeth þare ane stounde,
For-to þe tyme come þat it Ryne : and droppinde falle to grounde.
Ȝif it is cold up an heiȝ : þe dropen bi-cometh to snowe,*. [Nix.]
     607
And þanne*. [al. As Grando.] huy freosez adoneward : are huy comen here ouȝt lowe;
And ȝif it is þoruȝ-out cold : þat huy alle*. [al. al] i-frozen beo,
Þanne it is haul puyr : ase ȝe mouwen al day i-seo.
¶ þe breth of þe watere þat þe sonne : drauȝth op a-ȝein eue,
ȝwane þe sonne is to grounde i-go : it ne may nouȝt bi-leue,
     612
And ȝwane no-þing ne halt it up : and þe hete is al i-do,
*. [Ros.]þanne it fallez softe adoun : and to dewe bi-comez riȝt so,
And hangueth on leues and on gras : for-to þe hete a-morewe come
And þe sonne luyte and luyte : it habbe eft-sone up i-nome.
     616
¶ þe hore-forst cometh ȝwane it is so cold : þat it freoseth a-nyȝt,
And þe Dev freose a-doneward : ȝwane he is a-doun a-liȝt.
¶ Ȝif þe Devȝ is al-so up i-drawe : and a-doneward i-falle al-so
And þare come a þicke myst : and a cold forst þer-to,
     620
þanne freost þe þicke Myst : and cleouez an heiȝ on þe treo:
*. [pruyna.]And þarof comez þe Rym-forst : ase þilke Mist deth fleo;
he cleouez on hegges al a-bovte : and In þe wodes al-so,
On treo, on stones, on bestes al-so : þare it may cleouien to—
     624
I-chot wel, on mi fore-top : it hauez wel ofte i-do—.
In þis manere*. [MS. manere manere] ȝe mowen i-seo : þe kuynde of reyne and snowe,
Of hawel., of snovȝ*. [r. dev]., of Rym-forst : of hore-forst þat freost lowe,
Of cloudene and of Mist al-so— : for al o þing it is:
     628
For alle huy comiez of water-breth : þat þe sonne drauȝth up, i-wis.—
NOvþe is watur here on eorþe : wel more þane þe londe:
For sum o see, with-oute mo : is more, ich onder-stonde.
For þe gret . se . of occean : In þe on ende, i-wis,
     632
Is more þane al þe eorþe beo : and gret wonder it is.*. [r. nis]
For a-boute al þe eorþe heo geth : and brod heo is þare-to,
Ase þe ȝwyte of þe Eye goth a-boute þe ȝeolke : and more is al-so.
Ech oþur . se . a-mong us here : ne beo heo so gret non,
     636
Nis bote a lime of þulke se : and þudere In huy goth ech-on. Page  318
¶ Wellene comiez of grete wateres : and muche del of þe se
þoruȝ veynes al vnder eorþe : and to þe se wendez aȝe.
For þare beoz ase it veynene weren : onder eorþe mani on,
     640
þat sikeniez out of þe se : and þarof springueth þis wellene ech-on;
And þare-þoruȝ eornth þat watur faste : a-boute fram þe se,
And þare-ate wellen springuth out : and eft eorneth In aȝe.
So þat for alle þe grete wateres : þat to þe se goth echon
     644
Vnne[þe] is þe se eni-þing þe more : ake euere heo is bi on.
For ase swiþe it geth under eorþe : ase it comez in-to þe se, [folio 139b]
And euere to wellene it geth a-brod : and eft-sone ernth in aȝe;
And al-so sone ase ech watur comez : to þe se in is ende,
     648
To þe grete se of occean : ase swiþe it deth i-wende.
Þare-fore [for] alle þe wateres : þat to þe se doth gon,
þe se mot nedlingus beo : euere-more bi on.
þat heo flowez and ebbez : and wexet In a þrowe,
     652
þat is þoruȝ kuynde of þe mone : and riȝt nouȝt þoruȝ hire owe.
*. [Terra.]ÞE eorþe a-midde þe grete se : ase a luy[te] bal is round,
And puyr helle a-midde þe eorþe : ho-so souȝte þene ground.
And ȝeot ase gret ase þe eorþe þinchez : and ase luyte ase heo is,
     656
þare nis bote þat seouenþe del : þat Men woniez on, i-wis.
For In þe north side here : ho-so lie nele,
For it is feor fram þe sonne : no Man ne wonez for chele,
Ne In þe south half noþe-mo : for þe grete hete
     660
Of þe sonne þat is a-boue— : þe leomene beoth so grete*. [al. kete];
And manie oþur studes al-so : þei men miȝten wonien þare-Inne,
huy ne berez noþur corn ne fruyt : Manne is mete to wynne.
And þei þe eorþe were al to-delt : ho-so miȝte bi Art,
     664
Ȝeot nis þare, to wonien Inne : onneþe þe seuenþe part.—
Of þis foure elemenz : ech quic þing I-make is:
Of eorþe., of watur., and of þe eyr : and of fuyre, i-wis.
MAn hath of eorþe al is bodi : and of watere he hauez wete,
     668
Of þe Eyr he hath breth and wind : of fuyr he hath hete.
Ech quic þing [hath] of alle þeos foure : of some more and lasse.
Ho-so hath of þe eorþe mest : he is slouȝ ase þe Asse,
Of fade colur, of hard huyde : boistous fourme and ded strong,
     672
Of muche þouȝt, of luyte speche : stille groyninde and wrath long, Page  319
Of slouȝ wreche and Aruȝ mouth*. [al. fereblet] : fast. and loth to gyue guod,
Sone old and nouȝt willesfol : stable and studefast of mod.
Ho-so hath of þe watere mest : he schal beo ȝwit and fat al-so,
     676
Of nesche her and no-þing crips : gret slepare and slovȝ þar-to,
Snvuelinde nose and wet mouth : of fewe wordes : and luyte drinke,
Of schorte wrathþe and de-bonere : Arvȝ. *. [al. fereblet]and luyte luste swinke.
¶ ho-so haueth of þe eir mest : he is of guod colour,
     680
Fat and of nesche her : wel large and gret lechour,
LiȝInde and of glad semblaunt : and somdel of pruyte;
Habbe he mete and drinke I-novȝ : he carez elles luyte;
Wrathþe he berth luytel ȝwyle : he wole beo ballede sone;
     684
glad and bliþe, and onstable : of þat he hath to done.
¶ ho-so hath of fuyre mest : he is smal and red,
Oþur he is blac with cripse here : lene and sumdel qued,
Hinderful*. [al. hinder] and of bost I-novȝ : hardi and ofte lie,
     688
Sweriare and of manie word : and fol of lecherie,
Proud and wemod, and drinkare : and in wrathþe al-mest wod,
Hardi and liȝt and stalewarde : and wakiare wel guod. [folio 140]
Ake euerech of þeos foure elemenz : en-tempriez oþur, i-wis,
     692
So þat vnneþe In ani Man : any riȝ[t] puyr maister is.
Ake*. [al. ase] ȝif þov nimst riȝt puyr hot watur : and dost cold þar-to,
þov miȝt it makien euene wlach : and entempri it so.—
¶ þo ore louerd formest made man : he made him, i-wis,
     696
Of alle foure Elemens : ase man ȝeot i-mad is.
þo made he þe kuynde in eche manne : ase ȝe mouwe i-wite,
bi-twene Man and womman : of ȝwan we beoth bi-ȝite.
A swyþe foul þing is þat sed : of ȝwan Man is i-spreind;
     700
boþe Man and womman : to-gadere huy beoth i-meind.
Of ȝwijȝt colour it bi-leuez : ase it is i-write,
for-to a-boute þe twelfte day : þat it was bi-ȝite.
FOrmest þare keniez þar-of : smale bollene þreo,
     704
Ake euerech hangez faste on oþur : ho-so it miȝte i-seo.
Of þe hexte bolle comez þat brayn : þe heorte of þane a-midde,
þe liuere, þat is neþemest : heo comez of þe þridde.
þis beoth þe þreo hexte limes*. [MS. limest] : þat formest i-kenede beoz,
     708
And In heom is al ane Mannes lijf : ase [ȝe] nouþe i-seoth; Page  320
þare nis non of þulke þreo : þat hadde any wounde,
þat euereft miȝte I-held beo : to libbe anie stounde.
Aftur þe twelf formeste dawes : þat þet sed hath ȝwijȝt i-beo,
     712
hit bi-comez to a þicke blod : and chaungez al is bleo.
Hit þickez to*. [al. so] Nye dawes : for-to þe on and twentyþe day :
þanne it tornez formest to flesch : ase þe kuynde may.
Aftur eiȝte and twenti dawes : fourme it bi-gynnez to nyme,
     716
So þat In-with fourti dawes : it haueth euerech lime,
And in lasse ȝif it is a knaue : for he is of more hete.
Ȝwane þe limes beoth formest i-mad : huy ne beoz nouȝt ful grete.
     719
A smal weob it bi-cluppez al-a-boute : to holden it to-gadere faste,
Fram þat hit is formest i-kened : forto hit beo i-bore atþe laste.
¶ Al round it lith in þe wombe : and i-bouwed ase an hare
Ȝwane þat heo in fourme lith : for is .In. is sumdel nare.
Al I-buyd þe leggues beoz : it nolde nouȝt elles feiȝe,*. [al. veie]
     724
þe helene to þe bottokes : þe kneuwene in eiþur eiȝe;
þat heued is i-buid a-doneward : þe Armes al with-Inne,
þe elbouwes riȝt in þe schere : þe fustus to þe chinne;
Al i-buyd is þe rug : so þat neiȝ round it is.
     728
Man, ȝwar-of cometh þi pruyte? : for þare nis non, i-wis!
So heiȝ þov makest þe here : and to no man þou nelt a-buye :
Loke hov crekede*. [r. croked] þov were þare : and nouþe to no man þov nelt a-buye (!).
     731
þou ne miȝtest nouȝt þo holde up þin heued : ne enes on-do þin eiȝe;
Fra*. [orig. fram] ȝwam cam it sethþe þe : to beren þin heued so heiȝe?
Ȝif man him wolde bi-þenche : and riȝt him onder-stonde,
he scholde beo meoke, and milde of heorte : and to no man habben onde.*. [vv. 734-5 al. om.]
     735
IN eche manne þreo soulene beoth : ake nouȝt alle I-liche guode,
*. [Anime.]Ase ich seide eov er of þreo bollene : ȝif ȝe it onder-stode.
In þe Neþemeste bolle : þat þe liuere deoth of springue,
þare comez o-manere soule : at þe bi-guynningue
Ase it were a-manere lijf : þat sent norischingue
     740
To þe limes al-a-boute : and bi-ginnez*. [al. bringeth] in is wexingue;
So þat ane mannes norischingue : and is wexingue al-so
Of þulke furste soule comez : and of þe liuere þer-to. Page  321
þulke manere soule is : in ech wexinde þingue,
     744
In treon and in gras al-so : huy ne miȝten nouȝt elles springue.
þoruȝ vertue of þulke soule : ȝwane it is þer-to i-brouȝt
þat mannes lymes i-fourmede beoth : þat þare ne faillez nouȝt,
þanne comez þare In þe heorte : þat þe oþur bolle was,
     748
A soule þat bringuz þat lijf : þare it neuer er nas.
þat child is þanne quick a-non : ake strencþe nath it nouȝt
Enes for-to wawie him : are hit beo feorrore i-brouȝt.
Of þulke soule hath ech man : þat he mai wawi an gon
     752
In is bi-guynningue,*. [al. Is velynge] and al is lijf : and is fif wittes ech-on.
þulke soule hath ech þing : þat vuel*. [al. vele] may ouer*. [al. oþer] -go,
Best, . and foul, and fisch al-so : worm and oþure mo.
þeos soule þat bringuez þat lijf : is ate heorte grounde :
     756
þare-fore ho-so is þare i-smyte : he deiȝez in luyte stounde.
þeos soule comez of mannes cuynde : and þe oþere bi-fore al-so :
þare-fore, ȝwane a man deiȝez : huy deiȝez boþe-to.
Ȝeot þare is þe þridde soule : þat al heore maister is :
     760
For ȝwane a child hath alle is limes : [&]*. [om.] quike huy beoth, i-wis,
In þe ende of þe feorþe monþe : þat it was bi-ȝite,
Oþur sone þar-aftur-ward : ase we findez i-write :
ÞE cuynde þat ore louerd made : and porueide al-so
     764
þo he hadde Man formest I-mad : and in parays i-do,
To myenge þe kuynde of heuene : to mannes kuynde her,
And*. [al. Ane] soule of witte and of liue : þat is Aungelene i-pier,
heo comez fram þe kuynde of Aungles : and in þis fourme a-liȝt
     768
And miengez with þis wrechche flesch : ase ore louerd it hath i-diȝt,
And makez þe kuynde þat nas er : bote ase a best onneþe
þe kuynde of aungles with him bere : for-to he come to deþe.
þulke soule nimth hire In : and bi-leuez, i-wis,
     772
In þe childes brayn an heiȝ : þat is hexte lime is.
þulke soule i-last euere : and ne deiȝe[z] neuere mo,
And went, ȝwane a man schal deiȝe : to weole oþur to wo.
Al þat man hath bi-fore a best : oþur more resun can,
     776
Al he it hath of þulke soule : ȝware-þoruȝ he is man.
And ȝwane man went out of þis liue : þulke soule, i-wis,
Bi-guynnez departi fram þe bodie*. [MS. soule] : þe ȝwile he a-liue is, Page  322
And wend, ase heo hauez of-serued : to Ioye oþur to pine;
     780
þe soulene þat hire ferene weren : beoth sone i-brouȝt to fyne.
þulke þat halt ane Mannes lijf : and stikez in þe heorte,
Ȝwane heo schal with þe bodie [deiȝe] : þat in strong Anguysche deth smeorte,
Ȝif he onder-ȝit his felawe : to Ioye fram him i-wende,
     784
þare-fore heo maketh signe of Ioye : and deth as þe hiende;
And [ȝwan] heo deiez with þe bodie : fair chere heo makez and softe,
And bi-lef þat bodi in swych point : ase man may i-seon wel ofte :
þe eiȝene I-closede faire i-novȝ : þe mouth of faire chere,
     788
Ech lyme al-so faire i-streiȝt : In guod poynt ase he were.
þe þridde soule al-so ȝeot : þat deiez atþen ende,
þat norischingue to al þat bodi : ant to þe limes deth sende,
he deth ane*. [al. ek] signe in þe bodie : ȝif is felawe geth to guode,
     792
And bi-lefth þat bodi in fair hev : ȝwijȝt oþur red of blode.
þeos soulene*. [al. soule] deiȝez in a man : ȝwane þe hete is al i-do,
þe raþur þat*. [al. þe erore whan] he leost is breth : and waweȝIngue al-so.
Ȝwane huy i-seoz heore felawe : to torment i-brouȝt,
     796
Luþur semblaunt huy makiez boþe : as it ne likede heom nouȝt,
And bi-leueth þat bodi in foule heowe : þe eiȝene stareInde,
And þe mouth of foul semblaunt : and ofte is*. [al. om.] grenninde.
Swuche signes þat fereliche beoth : þat man may ofte i-seo,
     800
Beoth signes þat þe wrechche soule : in luþere weie beo.
Nov Iesu crist, þat us soule ȝaf : graunte us þat we hire moten so here rede
þat seint Miȝhel hire mote a-fongue : and bi-fore to Ioye lede. Amen.