The early South-English legendary ; or, Lives of saints. I. Ms. Laud, 108, in the Bodleian library. Edited by Carl Horstmann.
Horstmann, Carl, b. 1851.

44 Vita sancti Eadmundi regis.

SEint Eadmund þe holie kyng : i-bore was here bi este*. [The half-lines al. transposed.]
In þe on ende of Engelonde : of ȝwam Men makiez feste;
For of southfolke he was kyng : and of þe contreie wel wide.
Þare weren in Enguelonde þo : kyngus in fale side. Page  297
Swyþe fair knyȝt and strong he was : and hardi and quoynte,
Meoke and milde and ful of milce : and large in eche poynte.
Twey princes of an oþur lond : þat weren in luþere þouȝte,
Nomen heore red to-gadere faste : to bringue enguelond to nouȝte;
hubba was þat on i-hote : and þat oþur heiȝte hynguar.
Into enguelond huy comen with gret fierd : are ani man were i-war :
In North-humberlond huy bi-gunne : and þare huy slowen to grounde
And robbeden and barnden al to nouȝt : and destruyden al þat huy founde.
þo huy hadden north-humberlond : clanliche a-doun i-brouȝt,
Al-so huy wolden al enguelond : and þouȝten huy nolden blinne nouȝt :
hynguar, þat þe o. maister was : his felawe he bi-lefde þere,
hubba, [&] wende here bi este : to quelle þat þare were.
Of þe guodnesse of seint Eadmund : he heorde muche telle :
Into is lond he wende a-non : to fondi him to quelle.
Into is hexte toune he cam : er any man were i-war,
And robbede furst al þat he fond : and made þane toun wel bar;
And al-so he slov þat folk to grounde : al þat he miȝte of-gon,
Ȝong and old, wyf and Mayde : he ne sparede neuere on.
children fram heore moder breste : he drov and let heom quelle [folio 131b]
And al-to-hewe bi-fore þe moderes : þat reuþe it was to telle;
¶ þare-After he let þe Moderes a-sle : sorewe þare was I-novȝ!
þane toun he barnde al to douste : and al þat folk a-slovȝ.
he axede at some of þe men : ȝware heore kyng were;
And huy teiȝten him ȝware he was : huy ne dorsten non-oþur for fere :
In þe toune of Eglesdone : a guod wei þannes, he was.
þo þe luþere prince heorde þat : he ne made no softe pas,
Ake wende him þudere ful hastifliche : with is luþere men ech-one.
huy comen and metten þane holie kyng : with-oute þe ȝate al one.
A-non so hynguar wuste þat it was he : he let him nime þere,
And bi-segi is Men alle : þat with-Inne were.
¶ þis holie kyn[g] was faste Inome. : and In a luyte stounde
Bi-fore þe prince he was i-lad : naked and faste i-bounde,
*. [vv. 37-8 are to be transposed.]For-to a-fongue þare is dom : and non so men him nome (!),*. [al.: þo his dom was iȝyue, faste me him nom]
Riȝt as men ladden ore louerd bi-fore pilatus : for-to a-fongue is dome.
In a wode as he was i-lad : to a treo huy him bounde Page  298
And with smarte scourges beoten him sore : and maden him many a wounde.
þis holie man stod euere stille : he ne grochchede nouȝt ene,
Ake euere he cride "god, þin ore!" : and non oþur he nolde him mene.
So þat þis luþere tormentores : þat beoten him so sore,
þouȝten þat*. [al. þei] huy him schame duden : and*. [al. om.] hov huy miȝten don him more.
huy benden heore bouwene and stoden a-feor : and heore Arewene riȝten :
Ase to ane marke huy schoten to him : ase euene ase huy miȝten.
þe Arewene stikeden on him ful þicke : and al is bodi to-drowe;
And euere stod þis holie man : riȝt stille, ase þei he lowe.
Ase ful ase is an Irchepil : of piles al-a-boute,
So ful he stikede of Arewene : with-Inne and with-oute,
So ful, þat in none stude : on Arewe ne miȝte In wende
bote he for-korue some oþure : more is bodi to rende.
Ase þe holie man i-Martred was : seint sebastian,
Also huy serueden is holie bodi : and schoten þane holie man,
þat euerech pece fram oþur fleu : þat wonder was of is liue.
And euere he stod ase him no rouȝte : and cride on god wel bliue.
þo hynguar i-saiȝ þat huy ne miȝten : þare-with ouer-come him nouȝt,
A-non he let is heued of smyte : þat he were of liue i-brouȝt.
Ase þis holie man is beden bad : a man smot of is heued;
And*. [al. ac] is bodi was*. [al. was er] al-to-rend : and nouȝt i-hol bi-leued.
And for it was so al-to-drawe : huy leten it ligge þere.
Ake, for men ne scholden nouȝt finde is heued : forth with heom huy it bere
Into þe wode of Eglesdone : ane*. [MS. ane ane] derne stude huy founde :
A-mong þicke þornes huy it casten : and hudden it in þe grounde.
þo heo hadden of þis holie kyng : al heore wille þere,
glade and bliþe huy wenden forth : luþere Men ase it were.
þat heued huy hudden derneliche : þat no cristine man ne come,
Ȝif þat þare ani bi-lefte a-lyue : and with him þannes it nome. [folio 132]
A wilde wolf þare cam sone : and to þe heuede he drovȝ,
And þare oppe he lai and wuste it faste : a-ȝein is kuynde i-nouvȝ—
For is kuynde were more to for-swolewen it— : and lickede*. [MS. lickeden] it ofte and custe, Page  299
And riȝt ase he wolde is owene ȝwelp : with wilde bestes it wuste.
¶ Sethþe þare comen cristine Men : and in sum power weren i-brouȝt :
þat holie bodi huy founden sone : for it nas i-hud riȝt nouȝt.
Ake for huy ne founden nouȝt þat heued : a-boute huy wenden wide
And souȝtten it longue, In manie studes : euerech in his side.
huy ne miȝten it finde for no þyng. : so þat huy comen ane day
bi-sides þulke þicke þornes : þare ase þat heued lai.
huy nusten nouȝt þat it was þere. : þo bi-gan þat heued to grede,
Ase it a-mong þe þornes lay : and riȝt þeose wordes sede :
¶ "Here, here, here," with swete voyz : ase þei he were a-liue.
þo þat folk i-heorde þat : þuder-ward huy wenden bliue :
þat heued huy founden in þulke stude : ase hit him-sulf sede.
Louerd, i-hered beo þi miȝte : þat þare was a fair dede!
þat heued huy beren to þe bodi : and setten it euene þare-to,
And beren it forth with gret honovr : ase riȝt was forto do.*. [al. 4 vv. more.]
TO seint Eadmundesburie huy ladden him : ase men cleopiez nouþe þene toun—
þare is on Abbeie of blake Monkes : ase huy setten him a-doun.
In swyþe noble schrine huy brouȝten him : ase riȝt was for-to do.
þare he lijth ȝeot hol and sound : ase heo i-seoth þat comieth him to :
For is bodi þat was so to-drawe : hol bi-cam a-non
And sound, as þe ȝwyle he a-liue was : boþe of flesch and bon;
¶ þat heued al-so faste to þe bodi : ase it was euerer.
In al is bodi nas o weom : þat man miȝte i-seo þer,
bote ase is heued was of I-smyte : ase ore louerd it wolde,
A smal red line is al-a-boute : schininde ase of golde.
A swyþe fair pilegrimage it is : þudere forto fare,
For-to honouri þat holie bodi : þat þare hath i-leie so ȝare.
Novþe god for þe loue of seint Eadmund : þat was so noble king,
graunte us þe Ioye þat he is Inne : aftur ovre ending. Amen.