Þer ouer eode mony a Mon·, þe while þat hit þer lay,
A nusten not alle· hou holy hit was·, þat þer ouer eoden al day:
Line 160
¶ Þe Qween of Saba· com þer forþ·, ac anon þo heo hit seih,
Honourede hit feire· and sat a-kneo·, and nolde not come þer neih;
Bi a-noþur wey heo wende·, to kyng Salomon heo com,
For heo hym hedde wel wyde i-souht·, to leorne of him wisdom;
Line 164
Þorwh grace, þat vr lord hire ȝaf·, to kyng Salomon heo sede
Þat treo ne scholde ligge þer·, ȝif he dude by hire rede,
For þer scholde a mon ȝit dye· on þat ilke treo,
Þorwh whom· Al þe lawe of Gywes· distruyȝed scholde beo:
Line 168
¶ Salomon hit let nyme sone· and vndur eorþe hit caste,
Wel deope and fer from alle men·, and buriede hit wel faste;
So longe so hit þer-afterward was· a wel feir welle sprong,
A feyr watur wiþ gret [? god fisch.] sich·, boþe deop and long;
Line 172
Mony seke· þat þer comen· and wusch heore feet þer-on,
Oþur heore honden·, oþur baþeden al·, heore hele hedden anon:
Þat watur heo honoureden muche· and wolden þer-Inne wade,
Ac heo nusten no þing of þe treo· þat al þe vertu Made:
Line 176
Seþþe longe þer-afturward· þat vr lord on eorþe com,
Anon· þo þat folk by-speek his deþ· and heore Red þerof nom,
Þat treo bi-gon to fleoten a-non·, as vr lordes wille was:
Þe Gywes comen· and founden þat treo· fleotynde þer bi cas,
Line 180
Heo nomen hit vp· and for hit was foul· and i-leye hedde þer longe,
And maden þer-of þe holy Roode·, vr lord þer-on to honge;
