sayd to him / Syre he is oures / thenne said the deuyll to him: yf thou wylt worshyp me and be my seruaunte / and renye Ihesu cryst: thou shalt sitte on my right side The clerke anone blessid hym wyth the signe of the crosse· and sayd that he was the seruaunt of Ihesu cryst his sauyour And anone as he had made the crosse / þe grete multytude of deuylles vanyshed awaye /
¶ It happed that this notari after this on a tyme entred wyth his lorde in to the chirche of saint sophye / and kneled downe on his knees tofore thimage of the crucifyxe: the whiche cruci|fyxe as it semed loked moche openly and sharply vpon him· Thenne his lorde made him to goo aparte on a nother side: and alway the crucifyxe torned his eyen towarde hym. Thenne he made him goo on the lefte syde / and yet the crucifyxe loked on hym Thenne was the lorde moche amerueylled / and charged hym and commaunded him that he sholde telle him wherof he had soo deserued that the crucifixe soo behelde and loked on him / Thenne sayd the notarye that he cowde not remembre hym of noo good thynge that he had done / sauf that on a tyme he wolde not renye ne forsake the crucifyxe tofore the deuyll / Thenne lete vs so blysse vs wyth the sygne of the blessid crosse that we may therby be kepte fro the power of our goostly and dedely enmye the deuyll / And by the merites of the gloryous passion that our sauyoure [folio Cxxxiii:2] Ihesu cryst suffred on the crosse after this lyf we maye come to euerlastyng lyf in heuen / A M E N.
