hated [folio Cxxxiib:2] it soo moche / that where someuer he founde the crosse / he dyd it to be destroyed / for whan he wente in batayle ayenst them of perse he sente and commaunded quyriache to make sacrefyse to thydollis // And whan he wold not doo it / he dyde do smyte of his ryghte honde / and sayd wyth this honde hast thou wryten many lettres / by whiche thou repellyd moche folke fro doyng sacrefyse to our goddes: Quyryache said thou wood hounde thou hast don to me grete proffyte. For thou hast cut of the honde wyth whiche I haue many tymes wreten to the synagoges that they sholde not byleue in Ihesu cryst: And now sythe I am crysten / thou hast taken fro me that whyche noyed me: Thenne dyde Iulyan do melte leed and cast it in his mouth and after dide do bringe a bedde of yron / and made quyryache to be layed and stratched theron / and after layed vnder brennyng cooles. and threwe therin grees and salte / For to tourmente hym the more / and whan quiriache moeuyd not· Iulyan themperour sayd to hym / other þou shalt sacrefye our goddes / or thou shalt say at the leest thou art not crysten / and whan he sawe he wold do neuer neyther he dyde doo make a depe pytte ful of serpentes and venemous bestes / and caste hym therin / and whan he entred· anone the serpentes were all deed / Thenne Iulian put hym in a cawdron full of boylynge oyle: and whan he shold entre in to it / he blyssyd it and sayde / Fayr lord tourne this bayne to baptym of martyrdom / Thenne was Iulyan moche angry: and com|maunded that he shold be ryuen thorugh his herte wyth a swerd / and in thys manere he fynysshed his lyf /
The vertu of the crosse is declared to vs by many myracles / For it happed on a tyme that one enchauntour hadde dysceiued a notarye: and broughte hym [folio Cxxxiii:1] in to a place: where he had assembled a grete conpanye of deuylles / and promysed to him that he wold make him to haue moche rychesses And whan he came there he sawe one persone blacke sittyng on a grete chayer: and all aboute hym all full of horryble peple and blacke whiche had speres and swerdes: Thenne demaunded this grete deuyll of the enchauntour who was that clerke / then|chauntour
