þar-fore he went him sone in hy
vn-to þe mount of caluary;
and oþer folk went wiþ þe quene,
þidder þai went al bedene.
Line 176
¶ sone quen þai þaire praier makid,
þe erþ vnder ham hit shakid.
þen saide þe iew þat al þis herde,
"criste þou art sauiour of þis werde!"
Line 180
his claþis he kest, al bot his serke,
to make him nemil vn-to his werke;
siþen he toke a spade in hande,
lange he dalue, bot noȝt he fande;
Line 184
¶ quen he riȝt depe had dellui[n] sare,
mare þen xx. fote or mare,
þai fande iij. crossis; an was þat ilke,
bot wiste þai noȝt quilk was quilk,
Line 188
þe quilk muȝt be þe lordis tre,
and quilk muȝt þe theuis be:
wiþ mikil ioy and mikil gle,
to þe toun þai bare þa þre;
Line 192
þer ware þai done in certaine place,
for to a-bide our lordis grace.
Aboute midward of þe day and mare
a dede man cors forþ þai bare;
Line 196
saint elaine made hir praier þare,
so did al þe folk was þare,
þat crist sulde ham takening shaw
his awen dere tree to knaw.
Line 200
on aiþer tree þe cors on rane,
bot alwais lay hit stil as stane;
¶ þe þrid þai touchid wiþ his hide,
and vp he rase wiþ-outen bide,
Line 204
and spac wiþ a bliþ voyce,
and þus gatis he hailsed þe croice:—
"god loke þe cros precious þinge,
on þe hange þat heiest kinge;
Line 208
