And so he died þat ilk day;
Þan in a grafe þai gan him graue,
Whare kinges suld þaire beriing haue,
Line 604
With sang and grete solempnité,
Als fell to swilk a lord at be.
Quomodo salomon perfecit templum.
Salomon was corond king,
And led þe land at his liking;
Line 608
Moste sutile werkmen has he soght
And on þe temple fast þai wroght,
And endid it of masonry
In þe space of ȝeres twa and thretty;
Line 612
Forto tell all his fader tyme
And efter þe wirking of him;
And when it suld till end be brogh[t],
Þe wrightes þat þe timber wroght
Line 616
A mekill balk þam bud haue ane,
In þat cuntré þai kouth find nane,
Þai soght in toun and in ceté,
And nowre-whare might þai find a tre,
Line 620
Þat wald acorde vnto þaire met,
Bot þat þat dauid king had sett;
It forto take þe king cumand
And bad it suld no langer stand;
Line 624
Þan doun þai hewit þat haly tre
So þat þaire werk might endid be;
Þai caried it vnto þe kirk
And ordand werkmen it to wirk;
Line 628
Þe maisters has þaire mesure tane, [folio 80]
Þe lenkith threty cubites and ane;
Þai polist it and made it plaine,
Bot all þaire wirking was in vayne;
Line 632
When it was made efter þaire merk,
Þai wand it vp vnto þe werk
And langer þan þai fand þe tre,
By a cubet þan it suld be;
Line 636
